ନୂଆପଡା : ମାଠିଏ ପାଣି ପାଇଁ ଏଠାରେ ନିତି ଲାଗେ ଲମ୍ବା ଲାଇନ । ବିଲ ହୁଡା ଦେଇ ଗାଁର ଶହ ଶହ ମହିଳା ଯାଆନ୍ତି 2 କିଲୋମିଟର ଦୂରରେ ରହିଥିବା ନଦୀ ଚୁଆକୁ । ଆଉ ଏଠାରୁ ଯାହା ମିଳେ ତାକୁ ପିଇଲେ ଡାକ୍ତରଖାନା ଯିବା ନିଶ୍ଚିତ । ଏପରି ଦଶା ଭୋଗୁଛନ୍ତି ନୂଆପଡା ଜିଲ୍ଲା ଖଡିଆଳ ବ୍ଲକର ଖଇରଭାଡି ଗ୍ରମାବାସୀ ।
ପଥର ଉପରେ ଠିଆ ରହିଛି ଏହି ଗାଁ । ମାଟି ଖୋଲିଲେ ଖାଲି ମାଙ୍କଡା ପଥର । ପାଣି ନାଁରେ ଯେଉଁ କୂଅ ଆଉ ନଳକୂଅଟିଏ ଅଛି ସେ ବି ଶୁଖି ଆଁ କରିଛି । ଆଉ ରାସ୍ତାର ସ୍ଥିତି ଏପରି ଯେ ପାଦ ଥୋଇବାକୁ ଡର ମାଡୁଛି । କାଖରେ ପାଣି ଗରା, ହାତରେ ବାଲଟି ଧରି ବିଲ ହୁଡା ଦେଇ ପାଣି ଆଣୁଛନ୍ତି ଗାଁର ମହିଳା । ଆଉ ଏହି ମରଣଯନ୍ତା ରାସ୍ତାରେ ଦେଇ ଗଲାବେଳେ କାହିଁ କେତେ ଜଣ ଦୁର୍ଘଟଣାର ମଧ୍ୟ ଶୀକାର ହୋଇଥାନ୍ତି ।
ବର୍ଷେ କି 2 ବର୍ଷ ନୁହେଁ ଅନେକ ବର୍ଷ ଧରି ପାଣି ପାଇଁ ଡହଳବିକଳ ଏଠାକାର ଲୋକେ । କେବଳ ପାଣି ନୁହେଁ ବିଜୁଳି,ପାଣି,ଶିକ୍ଷା,ସ୍ୱାସ୍ଥ୍ୟ ଆଦି ସମସ୍ତ ମୌଳିକ ସୁବିଧାରୁ ବଞ୍ଚିତ ଏଠାରେ ବସକରୁଥିବା 900ରୁ ଉର୍ଦ୍ଧ୍ବ ଗ୍ରାମବାସୀ । ସରପଞ୍ଚଙ୍କ ଠାରୁ ସରକାର ସବୁଠି ଅଭିଯୋଗ କଲେ ବି ଫଳ ଶୂନ।
ଗ୍ରୀଷ୍ମ ଆସିଲେ ମନେପଡେ ଜଳକଷ୍ଟ । ଆଉ କଷ୍ଟ ଦେଖିଲେ ନଜରକୁ ଆସେ ସମସ୍ୟା । ଏପରି ସ୍ଥିତିରେ ପ୍ରତିଶ୍ରୁତିବଦ୍ଧ ଗାଁ ସରପଞ୍ଚ ଓ ପ୍ରଶାସନ ତାହା ଦେଖିବାକୁ ବାକି ରହିଲା ।
ନୂଆପଡାରୁ ମୋତିଲାଲ ବାଗ, ଇଟିଭି ଭାରତ
