ନୂଆପଡା: ଜିଲ୍ଲାର ଖଡ଼ିଆଳ ବ୍ଲକ ଚେୟାରମ୍ୟାନ ବାଳକୃଷ୍ଣ ଶବରଙ୍କ ବିରୁଦ୍ଧରେ ଅନାସ୍ଥା ପ୍ରସ୍ତାବ ପ୍ରସଙ୍ଗରେ ଭିନ୍ନମୋଡ଼ । ଅନାସ୍ଥା ପ୍ରସ୍ତାବ ଭୋଟିଂ ପରେ ଭୋଟ ଗଣତି ସ୍ଥଗିତ ହୋଇଛି ।
ବ୍ଲକ ଚେୟାରମ୍ୟାନ ବାଳକୃଷ୍ଣ ଶବର ସମିତି ସଭ୍ୟ, ସରପଞ୍ଚ ଏବଂ ଜନପ୍ରତିନିଧିଙ୍କୁ ଗାଳିଗୁଲଜ ସହ ଦୁର୍ବବ୍ୟହାର କରୁଥିବା କାରଣରୁ ଦୀର୍ଘ ଦିନଧରି ଅଶାନ୍ତର ଦାନା ବାନ୍ଧୁଥିଲା ।
ଗତ ଅଗଷ୍ଟ ମାସ 30 ତାରିଖ ଦିନ ସମିତି ବୈଠକ ଚାଲିଥିବାବେଳେ ସମୂହ ସରପଞ୍ଚ ସମିତି ସଭ୍ୟ ଚେୟାରମ୍ୟାନଙ୍କ ବିରୁଦ୍ଧରେ ବୈଠକକୁ ପ୍ରତ୍ୟାଖାନ କରିଥିଲେ ।
ପରେ ଅନାସ୍ଥା ପ୍ରସ୍ତାବ କରିବା ପାଇଁ ନୂଆପଡା ନିର୍ବାଚନ ଅଧିକାରୀ ଉପ ଜିଲ୍ଲାପାଳଙ୍କ ପାଖରେ ଅଭିଯୋଗ କରିଥିଲେ । ଅଭିଯୋଗକୁ ଭିତ୍ତିକରି ଶୁକ୍ରବାର ଖଡ଼ିଆଳ ବ୍ଲକ କାର୍ଯ୍ୟାଳୟ ଠାରେ ଅନାସ୍ଥା ପ୍ରସ୍ତାଵ ଭୋଟିଂ ହୋଇଥିଲା । 54 ଜଣ ସରପଞ୍ଚ ସମିତି ସଭ୍ୟ ଭୋଟର ମଧ୍ୟରୁ 52 ଜଣ ଚେୟାରମ୍ୟାନଙ୍କ ସପକ୍ଷ ଓ ବିପକ୍ଷବାଦୀ ଭୋଟ ଦେଇଥିଲେ ।
ସମସ୍ତଙ୍କ ଆଶା ଥିଲା ଚେୟାରମ୍ୟାନ ବାଳକୃଷ୍ଣ ଶବର ଗାଦିରୁ ହଟିବେ ବୋଲି । ହେଲେ ତାହା ହେଲାନାହିଁ । ମାନ୍ୟବର ହାଇକୋର୍ଟଙ୍କ ନିର୍ଦ୍ଦେଶ କ୍ରମେ ଭୋଟ ଗଣତି ସ୍ଥଗିତ ରହିଥିବା ସୂଚନା ଦେଇଛନ୍ତି ଉପଜିଲ୍ଲାପାଳ ତରଣୀ ସେନ ନାଏକ ।
ଅପରପକ୍ଷେ ପଞ୍ଚାୟତିରାଜ ନିୟମ 46 ସେକ୍ସନ ଟୁ ପ୍ଲସ ସି କୁ ନୂଆପଡା ଜିଲ୍ଲା ପ୍ରଶାସନ ବ୍ୟତିକ୍ରମ କରିଛି । ଯେଉଁଥିପାଇଁ ମୁଁ ହାଇକୋର୍ଟର ଆଶ୍ରୟ ନେଇଥିଲି । କୋର୍ଟର ନିର୍ଦ୍ଦେଶ ମୁତାବକ ଭୋଟିଂ ପରେ ଭୋଟ ବାକ୍ସରେ ହିଁ ରହିଲା । ମୁଁ ବଳବତ୍ତର ଅଛି ବୋଲି ପ୍ରତିକ୍ରିୟାରେ ଚେୟାରମ୍ୟାନ ବାଳକୃଷ୍ଣ ଶବର କହିଛନ୍ତି ।
ନୂଆପଡାରୁ ମୋତିଲାଲ ବାଗ, ଇଟିଭି ଭାରତ
