ନୂଆପଡା: ଜିଲ୍ଲାରେ ପୋଲିସ ପକ୍ଷରୁ ବିଭିନ୍ନ ସ୍ଥାନରେ ଅଚାନକ ଚଢାଉରେ ଦୁଇ ବାଇକ ଚୋର ଗିରଫ ହୋଇଛନ୍ତି । ସେମାନଙ୍କ ଠାରୁ 9ଟି ଚୋରା ବାଇକ ଜବତ କରିଛି ପୋଲିସ ।
ସୂଚନାଅନୁସାରେ,ଜିଲ୍ଲାର ଖରିଆରରୋଡ଼ ଜ୍ୟୋଙ୍କ ଥାନା ଅଞ୍ଚଳରେ ଦିନକୁ ଦିନ ବାଇକ ଚୋରି ନେଇ ଥାନାରେ ଅଭିଯୋଗ ହୋଇ ଆସୁଥିଲା । ଚୋରଙ୍କୁ କାବୁ କରିବା ପୋଲିସ ପାଇଁ ଏକ ଚ୍ୟାଲେଞ୍ଜ ହୋଇଥିଲା । ଗତକାଲି ଆରକ୍ଷୀ ଅଧିକ୍ଷକ ରାହୁଲ ଜୈନଙ୍କ ନିର୍ଦ୍ଦେଶ କ୍ରମେ 2ଗୋଟି ସ୍ୱତନ୍ତ୍ର ପୋଲିସ ଦଳ ଗଠନ ହୋଇଥିଲା । ଯାହାର ନେତୃତ୍ୟ ନୂଆପଡା ଆଇଆଇସି ସଂଯୁକ୍ତା ବାର୍ଳା ଏବଂ ଖରିଆରରୋଡ଼ ଜୋଙ୍କ ଥାନା ଆଇଆଇସି ଅନିରୁଦ୍ଧ ମୁଦୁଲି ନେଇଥିଲେ ।
ଏହାପରେ ଖରିଆର ରୋଡ଼ ଏବଂ ନୂଆପଡା ଅଞ୍ଚଳର ବିଭିନ୍ନ ସ୍ଥାନରେ ଅଚାନକ ଚଢ଼ାଉ କରି 9ଗୋଟି ଚୋରା ମୋଟରସାଇକେଲ ଜବତ କରିବା ସହ 2ଜଣ ଚୋରକୁ ଗିରଫ କରିବାରେ ସଫଳ ହୋଇଛି ପୋଲିସ । ଗିରଫ 2ଜଣ ଚୋର ଭାଁନପୁର ଗ୍ରାମର ପିଣ୍ଟୁ ରାଉତ ଏବଂ ନୂଆପଡାର ପ୍ରଦୀପ ପୁଝାରି ବୋଲି ନୂଆପଡା ଏସଡିପିଓ ପ୍ରଶାନ୍ତ କୁମାର ପଟ୍ଟନାୟକ ସୂଚନା ଦେଇଛନ୍ତି ।
ନୂଆପଡାରୁ ମୋତିଲାଲ ବାଗ,ଇଟିଭି ଭାରତ
