ନୂଆପଡ଼ା: ଖଡ଼ିଆଳ ଥାନା ଅନ୍ତର୍ଗତ ରିଷି ଗାଁରେ ବଧୂହତ୍ୟା ଅଭିଯୋଗ । ଏହି ଘଟଣାରେ ସ୍ବାମୀ, ଶ୍ବଶୁର ଏବଂ ଶାଶୁକୁ ଖଡ଼ିଆଳ ପୋଲିସ ଗିରଫ କରାଯାଇଛି । ଗିରଫ ୩ ଅଭିଯୁକ୍ତଙ୍କୁ କୋର୍ଟ ଚାଲାଣ କରିଥିବା ଖଡ଼ିଆଳ ଥାନା SDPO ସନ୍ତକ ଜେନା ଗଣମାଧ୍ୟମକୁ ସୂଚନା ଦେଇଛନ୍ତି ।
ଗିରଫ ଅଭିଯୁକ୍ତ ହେଲେ ସ୍ବାମୀ ଚିତମନ ଦଳ, ଶ୍ବଶୁର ଦ୍ରୋଣ ଦଳ ଏବଂ ଶାଶୁ ପୁନେ ଦଳ ବୋଲି ଜଣାପଡିଛି । ସୂଚନା ଅନୁସାରେ କୋମନା ଥାନା ଅନ୍ତର୍ଗତ ବହଳମୁଣ୍ଡା ଗ୍ରାମର ଭରତ ଦଳଙ୍କ ଝିଅ ସୁମିତ୍ରା ଦଳ ଖଡ଼ିଆଳ ଥାନା ଅନ୍ତର୍ଗତ ରିଷି ଗାଁର ଚିତମନ ଦଳଙ୍କୁ ଦ୍ଵିତୀୟ ବିବାହ କରିଥିଲେ । ପାରିବାରିକ କଳହକୁ କେନ୍ଦ୍ରକରି ଚଳିତମାସ 11 ତାରିଖ ନୂଆଖାଇ ଦିନ ଉଭୟ ସ୍ବାମୀ, ସ୍ତ୍ରୀ, ଶାଶୁ, ଶ୍ବଶୁର ଝଗଡ଼ା ଲାଗିଥିଲେ । ଏହାପରେ 13 ତାରିଖ ବଧୂ ସୁମିତ୍ରାଙ୍କୁ ହତ୍ୟା କରି ଆତ୍ମହତ୍ୟା ରୂପ ଦେଇ ନିକଟସ୍ଥ ଡଙ୍ଗରରେ ପୋତି ଦେଇଥିଲେ ।
ଘଟଣାକୁ ସନ୍ଦେହ କରି ସୁମିତ୍ରାଙ୍କ ବାପା ଭରତ ଦଳ ଝିଅକୁ ହତ୍ୟା କରି ଆତ୍ମହତ୍ୟା ରୂପ ଦେଇଥିବା ଖଡ଼ିଆଳ ଥାନାରେ ଅଭିଯୋଗ କରିଥିଲେ । ଏହାପରେ ଖଡ଼ିଆଳ ପୋଲିସ ତତ୍ପରତା ପ୍ରକାଶ କରି ଘଟଣାର ତଦନ୍ତ କରି ମାଟିତଳୁ ମୃତଦେହ ଉଦ୍ଧାର କରି ବ୍ୟବଚ୍ଛେଦ ପାଇଁ ପଠାଇଛନ୍ତି । ଏହି ଘଟଣାରେ ମୃତ ସୁମିତ୍ରାଙ୍କ ସ୍ବାମୀ ଚିତମନ ଦଳ, ଶ୍ବଶୁର ଦ୍ରୋଣ ଦଳ ଏବଂ ଶାଶୁ ପୁନେ ଦଳକୁ ଗିରଫ କରି କୋର୍ଟ ଚାଲାଣ କରାଯାଇଥିବା ଖଡ଼ିଆଳ SDPO ସନ୍ତକ ଜେନା ପ୍ରକାଶ କରିଛନ୍ତି ।
ନୂଆପଡ଼ାରୁ ମୋତିଲାଲ ବାଗ, ଇଟିଭି ଭାରତ
