ନୂଆପଡ଼ା: ସିନାପାଲି ବ୍ଲକ ନୂଆପଡାରେ ବିଜେପିର ମିଶ୍ରଣ ପର୍ବ ଅନୁଷ୍ଠିତ ହୋଇଛି । ଏହି ମିଶ୍ରଣ ପର୍ବ କଳାହାଣ୍ଡି ସାଂସଦ ବସନ୍ତ ପଣ୍ଡାଙ୍କ ଅଧ୍ୟକ୍ଷତାରେ ଅନୁଷ୍ଠିତ ହୋଇଥିବା ବେଳେ ବିଜୁ ଜନତା ଦଳ ଓ କଂଗ୍ରେସର ଅନେକ ଅସନ୍ତୁଷ୍ଟ କର୍ମୀ ବିଜେପିରେ ଯୋଗ ଦେଇଛନ୍ତି ।
ରାଜ୍ୟ ସରକାରଙ୍କ ନେତା, ମନ୍ତ୍ରୀ କର୍ମୀଙ୍କ କାର୍ଯ୍ୟକଳାପରେ ଅସନ୍ତୁଷ୍ଟ ହୋଇ ବିଜେପିରେ ଯୋଗ ଦେଇଥିବା ବିଜେଡ଼ି ନେତାମାନେ ପ୍ରକାଶ କରିଛନ୍ତି । ବିଜେପି ବିଜୁ ଜନତା ଦଳର ବିଫଳତାକୁ ନେଇ ଲୋକଙ୍କୁ ଭୋଟ ମାଗିବ ବୋଲି କହିଛି । ମଣ୍ଡିରୁ ଧାନ ଉଠିବା ପ୍ରସଙ୍ଗଠୁ ଆରମ୍ଭ କରି ବିଦ୍ୟାଳୟରେ ଶିକ୍ଷକଙ୍କ ପଦଖାଲି ପ୍ରସଙ୍ଗ, ଡାକ୍ତରଖାନାରେ ଡାକ୍ତର ନଥିବା ଓ ସର୍ବୋପରି ମମିତା ମେହେର ହତ୍ୟା ଘଟଣାକୁ ମୁଖ୍ୟ ପ୍ରସଙ୍ଗ କରିବ ବୋଲି କହିଛି ବିଜେପି ।
ଆଗାମୀ ଦିନରେ ନୂଆପଡା ଜିଲ୍ଲା ପରିଷଦ ଗଠନ କରିବା ବିଜେପି ବୋଲି ଦୃଢୋକ୍ତି ପ୍ରକାଶ କରିଛନ୍ତି କଳାହାଣ୍ଡି ସାଂସଦ ବସନ୍ତ ପଣ୍ଡା । ଏହି ମିଶ୍ରଣ ପର୍ବ ଅବସରରେ ସାଂସଦ ବସନ୍ତ ପଣ୍ଡାଙ୍କ ସମେତ ଖଡ଼ିଆଳ ପୂର୍ବତନ ବିଧାୟକ ହିତେଶ କୁମାର ବଗର୍ତ୍ତି, ରାଜ୍ୟ କାର୍ଯ୍ୟକାରିଣୀ ସଦସ୍ୟ ଶିବ ପ୍ରସାଦ ମୁଣ୍ଡ, ବରିଷ୍ଠ ବିଜେପି ନେତା ମାର୍କଣ୍ଡ ଗହୀର ପ୍ରମୁଖ ଉପସ୍ଥିତ ଥିଲେ । ଯୋଗ ଦେଇଥିବା କର୍ମୀଙ୍କୁ ଖୁସିର ସହିତ ସ୍ବାଗତ କରିଛି ବିଜେପି ।
ନୂଆପଡ଼ାରୁ ମୋତିଲାଲ ବାଗ, ଇଟିଭି ଭାରତ
