ନୂଆପଡା: ଗରିବ ଅସହାୟ ପରିବାରକୁ ଥଇଥାନ କରି ସମାଜର ମୁଖ୍ୟସ୍ରୋତରେ ସାମିଲ କରିବାପାଇଁ ସରକାର ସାମାଜିକ ସୁରକ୍ଷା ଯୋଜନା କରିଛନ୍ତି । ଏହି ଜନମଙ୍ଗଳକାରୀ ଯୋଜନାରେ ସାମିଲ କରି ଗରିବଙ୍କ ସୁରକ୍ଷିତ ଜୀବନଯାପନ ପାଇଁ ସରକାର ସର୍ବଦା ଚେଷ୍ଟିତ ଥିବା ଡିଣ୍ଡିମ ପିଟୁଛନ୍ତି । ହେଲେ ସରକାରଙ୍କ ଯୋଜନାରୁ ବଞ୍ଚିତ ରହିଯାଉଛନ୍ତି ପ୍ରକୃତ ହିତାଧିକାରୀ । ସରକାରୀ ବାବୁଙ୍କ ଦୃଷ୍ଟି ଆଢୁଆଳରେ ରହି ଦୁର୍ଦ୍ଦିନରେ ଦିନ କାଟୁଛନ୍ତି ଗରିବ ହିତାଧିକାରୀ । ଏହାର ଜ୍ବଳନ୍ତ ଉଦାହରଣ ପାଲଟିଛନ୍ତି ନୂଆପଡା ଜିଲ୍ଲା ଖଡିଆଳ ବ୍ଲକ ଗୋଡତଲା ଗାଁ ରୋହିତ ମଲ୍ଲିକ ।
ପରିବାର ପ୍ରତିପୋଷଣ ଆଶାରେ ସୁଦୂର ଚେନ୍ନାଇ ସହରକୁ 2018 ମସିହାରେ ଦାଦନ ଖଟି ଯାଇଥିଲେ ରୋହିତ । ସେଠାରେ କାମକରିବା ଅବସ୍ଥାରେ ଏକ ସଡକ ଦୁର୍ଘଟଣାରେ ରୋହିତଙ୍କ ମେରୁଦଣ୍ଡ ଭାଙ୍ଗି ଯାଇଥିଲା । ଅର୍ଥ ଅଭାବରୁ ଚିକିତ୍ସା ହୋଇନପାରି ଟ୍ରାଇ ସାଇକେଲ ସାହାଯ୍ୟରେ ନିଜ ଗାଁ ଗୋଡ଼ତଲାରେ ଦୁର୍ଦ୍ଦିନରେ ଦିନ କାଟୁଛନ୍ତି ରୋହିତ । ରୋଜଗାରିଆ ରୋହିତ ଦିବ୍ୟାଙ୍ଗ ହେବା ପରେ ପରିବାରର ଦୁଃଖ ଦ୍ବିଗୁଣିତ ହୋଇଯାଇଛି । ବେଳେ ଖାଇଲେ ବେଳେ ଉପବାସ ରହିବାକୁ ପଡୁଛି । ଏପଟେ ଘରଭାଙ୍ଗି ଦଦରା ଦିନରେ ସୂର୍ଯ୍ୟ ରାତ୍ରିରେ ଚନ୍ଦ୍ର ଦେଖାଦେଉଛି । ଖରା ବର୍ଷା ଶୀତ କାକରରେ ପାଳ ଟଣା ଘରେ ରହି ଦିନ କାଟୁଛନ୍ତି 4 ପ୍ରାଣୀ କୁଟୁମ୍ବ ।
