ନୂଆପଡ଼ା: ଖରା ହେଉ କିମ୍ବା ବର୍ଷା ଧାନ ମଣ୍ଡିରୁ ଖାଲି ହେଉନି ଧାନ । ଫଳରେ ବାଜିରେ ଲାଗିଛି ଚାଷୀଙ୍କ ଅମଳ । ପ୍ରାକ ମୌସୁମୀ ବର୍ଷାରେ ନୂଆପଡା ଜିଲ୍ଲା ବୋଡେନ ବ୍ଲକ ପଲସଦା ଧାନମଣ୍ଡିରେ ଗଜା ହେବାରେ ଲାଗିଛି ବସ୍ତାବସ୍ତା ଧାନ । ପାଖାପାଖି 4 ହଜାରୁ ଊର୍ଦ୍ଧ୍ବ ଫସଲ ନଷ୍ଟ ହୋଇଥିବା ବେଳେ ଋଣ ବୋଝକୁ ନେଇ ଚାଷୀଙ୍କୁ ଏବେ ଚିନ୍ତା ଘାରିଛି ।
ସେପଟେ ନିଜ ଅମଳକୁ ସମ୍ଭାଳିବାରେ ଲାଗିଛନ୍ତି ଚାଷୀ । କିଏ ପଲିଥିନ ଢାଙ୍କି ନିଜ ପରିଶ୍ରମର ଧନକୁ ବଞ୍ଚାଇବାକୁ ଚେଷ୍ଟା କରୁଛି ତ କିଏ ପାଣି କାଢିବାରେ ଲାଗିଛି । ଏମିତି ଦୀର୍ଘ 15 ଦିନ ଧାନମଣ୍ଡିରେ 35 ଜଣ ଚାଷୀ ଅହୋରାତ୍ର ପହରା ଦେଉଛନ୍ତି । କିନ୍ତୁ ବିକ୍ରି ହୋଇପାରୁ ନାହିଁ ଧାନ । ମଣ୍ଡିକୁ ମିର୍ଲର, ଖଇରା ସମବାୟ ସମିତି(ପେକ୍ସ) କିମ୍ବା ଆରଏମସିଙ୍କ ଦେଖାନାହିଁ ।
ଜିଲ୍ଲାର ମାଣ୍ଡୋବିର୍ଲି, ଡମଝର, ଋଣିବସା ଗାଁର ଚାଷୀମାନେ ଧାନ ବିକ୍ରି ପାଇଁ ପଲସଦା ମଣ୍ଡିକୁ ଆସିଥିଲେ । ବହୁ ବ୍ୟାଙ୍କ, ସାହୁକାରଙ୍କ ଠାରୁ ଋଣ କରି ପରିଶ୍ରମରେ ଅମଳ କରିଥିଲେ ଚାଷୀ । କିନ୍ତୁ ସମସ୍ତ ଫସଲ ଏବେ ବତୁରିବାରେ ଲାଗିଛି । ଆଉ ଯଦି ମିଲର୍ସ ଆସିଛନ୍ତି, ତେବେ କଟନୀଛଟନୀର ବି ଭୟ ରହୁଛି ।
ସରକାର ଖଇରା ସମବାୟ ସମିତିକୁ ୧୬ ହଜାର କ୍ବିଣ୍ଟାଲ ଧାନ କ୍ରୟ କରିବା ପାଇଁ ଟାର୍ଗେଟ ଦେଇଥିଲେ । ମାତ୍ର ବିକ୍ରି ହୋଇଛି ୭ ହଜାର କ୍ବିଣ୍ଟାଲ ଧାନ । ତେଣୁ ଗୋଟିଏ ପଟେ ଚାଷୀ ଧାନ ଉଠାଇବାକୁ ଅଡି ବସିଥିବାବେଳେ ତୁରନ୍ତ ଧାନ ଉଠାଇବାକୁ ପ୍ରତିଶୃତି ଦେଇଛନ୍ତି ଖଇରା ସମବାୟ ସମିତିର ସଭାପତି ।
ନୂଆପଡାରୁ ମୋତିଲାଲ ବାଗ, ଇଟିଭି ଭାରତ
