ନୂଆପଡା: ବିଛିନ୍ନାଞ୍ଚଳ କୁହାଯାଉଥିବା ସୁନାବେଡା ଅଭୟାରଣ୍ୟରେ ଲୋକେ ବିଜୁଳି, ଶିକ୍ଷା, ସ୍ବାସ୍ଥ୍ୟ, ଗମନାଗମନ ଭଳି ଏକାଧିକ ମୌଳିକ ଅଧିକାର ପାଉନଥିବା ଦୀର୍ଘବର୍ଷ ଧରି ଅଭିଯୋଗ କରି ଆସୁଛନ୍ତି । ଅଭୟାରଣ୍ୟବାସୀଙ୍କ ଅଭିଯୋଗକୁ ରାଜ୍ୟ ସରକାର କିମ୍ବା ଜିଲ୍ଲା ପ୍ରଶାସନ ଗୁରୁତ୍ବ ଦେଉନଥିବା ମଧ୍ୟ ଗଣମାଧ୍ୟମ ସମ୍ମୁଖରେ ପ୍ରକାଶ କରିଛନ୍ତି । ଯାହାଫଳରେ ଆଗାମୀ ଦିନରେ ଓଡିଶା ଛାଡି ଛତିଶଗଡ଼ ରାଜ୍ୟରେ ସାମିଲ ହେବାକୁ ଯୋଜନା କରୁଛନ୍ତି ଅଭୟାରଣ୍ୟ ବାସୀ ।
ଏହି ଖବର ବିଭିନ୍ନ ଗଣମାଧ୍ୟମରୁ ଜାଣିବା ପରେ ଅଭୟାରଣ୍ୟ ଲୋକଙ୍କୁ ବୁଝାଇବା ପାଇଁ ଆଜି ନୂଆପଡା ଜିଲ୍ଲା ଜୟ କିଷାନ ମଜଦୂର ସଂଗ୍ରାମ ପରିଷଦ ଆବାହକ ଯଦୁମଣି ପାଣିଗ୍ରାହୀ ଅଭୟାରଣ୍ୟକୁ ପହଞ୍ଚି ସ୍ଥାନୀୟ ଲୋକଙ୍କ ସହ ବିଷଦ ଆଲୋଚନା କରିଛନ୍ତି । ଅଭୟାରଣ୍ୟ ଲୋକଙ୍କ ସମସ୍ୟା ଓ ତାର ସମାଧାନ ପାଇଁ ଜିଲ୍ଲା ପ୍ରଶାସନ ତଥା ରାଜ୍ୟ ସରକାରଙ୍କୁ ଅବଗତ କରିବେ ବୋଲି ପ୍ରତିଶ୍ରୁତି ଦେଇଛନ୍ତି ଯଦୁମଣି । ଅପରପକ୍ଷେ ଅଭୟାରଣ୍ୟ ଲୋକ ତାଙ୍କର କଣ ସମସ୍ୟା ରହିଛି ଏପର୍ଯ୍ୟନ୍ତ ନୂଆପଡା ଜିଲ୍ଲାପାଳଙ୍କୁ ଜଣାଇନଥିବା ଜିଲ୍ଲାପାଳ ସ୍ବାଧାଦେବ ସିଂ ସୂଚନା ଦେଇଛନ୍ତି ।
ନୂଆପଡାରୁ ମୋତିଲାଲ ବାଗ , ଇଟିଭି ଭାରତ
