ନୟାଗଡ: ଧାର ଟଙ୍କାକୁ ନେଇ ବଡ ଭାଇକୁ ସାନ ଭାଇର ବୋମା ମାଡ଼ ଘଟଣା । ଚିକିତ୍ସାଧୀନ ଅବସ୍ଥାରେ ବଡଭାଇ ପଦ୍ମନାଭ ନାୟକ ମୃତ୍ୟୁ । ଅଭିଯୁକ୍ତ ସାନ ଭାଇ ଚକ୍ରଧର ନାୟକ ଏବଂ ତାର ସହଯୋଗୀ ମନୋଜ ମହାରଣାକୁ ଗିରଫ କରିବା ସହ ଉଭୟଙ୍କ ଠାରୁ 4 ଅଫୁଟା ବୋମା ସମେତ ଏକ ୟାମାହା ବାଇକକୁ ଜବତ କଲା ପୋଲିସ ।
ମିଳିଥିବା ସୂଚନା ଅନୁୟାୟୀ ଶୁକ୍ରବାର ଦିନ ଜିଲ୍ଲା ବାହାଡା ଝୋଲା ଛକ ନିକଟରେ ସାନ ଭାଇ ଚକ୍ରଧର ନାୟକ ଓ ବଡ଼ ଭାଇ ପଦ୍ମନାଭ ନାୟକଙ୍କ ମଧ୍ୟରେ ଧାର ଟଙ୍କାକୁ ନେଇ ବଚସା ହୋଇଥିଲା । ଏହାପରେ ଏଥିରେ ଚକ୍ରଧର ନାୟକ ଉତକ୍ଷିପ୍ତ ବାହାଡା ଝୋଲା ଛକ ଉପରେ ହୋଇ ବଡ଼ ଭାଇ ଉପରେ ବୋମା ମାଡ଼ କରିଥିଲା । ସାନଭାଇ ରାଗ ତମତମ ହୋଇ ଭାଇକୁ ଜୀବନରେ ମାରିଦେବାକୁ ଯୋଜନା କରିଥିଲା। ଏନେଇ ଗ୍ରାମର ମନୋଜ ମହାରଣାଙ୍କ ପାଖରେ ଥିବା ୫ଟି ଅଫୁଟା ବୋମାରୁ ଚକ୍ରଧର ୨ଟି ବୋମା ଆଣି ରାସ୍ତାରେ ପଦ୍ମନାଭ ଯାଉଥିବା ବେଳେ ତାଙ୍କ ଉପରକୁ ଗୋଟିଏ ବୋମା ମାଡ଼ କରିଥିଲେ।
ଫଳରେ ବଡ଼ଭାଇ ପଦ୍ମନାଭ କ୍ଷତାକ୍ତ ହୋଇ କିଛିଦୂର ଛିଟିକି ପଡିଥିଲେ। ଖବରପାଇ ଓଡ଼ଗାଁ ଥାନା ଅଧିକାରୀ ଓ କର୍ମଚାରୀମାନେ ଘଟଣା ସ୍ଥଳରେ ପହଞ୍ଚି ବଡଭାଇ ପଦ୍ମନାଭକୁ ଉଦ୍ଧାର କରିବା ସହ ନୟାଗଡ଼ ଜିଲ୍ଲା ମୁଖ୍ୟ ଚିକିତ୍ସାଳୟ ଓ ପରେ କଟକ ବଡ଼ ମେଡ଼ିକାଲରେ ଭର୍ତି କରିଥିଲେ । ତେବେ ଗତକାଲି ଚିକିତ୍ସାଧୀନ ଅବସ୍ଥାରେ ପଦ୍ମନାଭଙ୍କ ମୃତ୍ୟୁ ଘଟିଥିବା ସୂଚନା ମିଳିଛି ।
ନୟାଗଡରୁ ଜୟେନ୍ଦ୍ର ବେହେରା, ଇଟିଭି ଭାରତ
