ନୟାଗଡ଼: ଓଡିଶାର ଲାଇଫ ଲାଇନ କୁହାଯାଉଥିବା ମହାନଦୀ ଏବେ ସଙ୍କଟରେ l ଏବେ ଠାରୁ ଆରମ୍ଭ ହେଲାଣି ଜଳ ସଙ୍କଟ l ଯାହାର ସିଧା ସଳଖ ପ୍ରଭାବ ପଡିଛି ନୟାଗଡ଼ ଜିଲ୍ଲାରେ । ମହାନଦୀ ଜଳ ବଣ୍ଟନର ସମଧାନ ପାଇଁ ଗଠିତ ଟ୍ରିବ୍ୟୁନାଲକୁ 3 ବର୍ଷ ବିତିଯାଇଥିଲେ ବି ବାହାରି ପାରିନି ସମାଧାନର ବାଟ । ସମୟ ଯେତିକି ଗଡୁଛି ଜଳ ସ୍ତର ମହାନଦୀରେ ସେତିକି କମୁଛି ।
ମହାନଦୀ ଉପରେ ନିର୍ଭର କରୁଥିବା ଜିଲ୍ଲାର ମତ୍ସଜୀବୀ ଏବଂ ଚାଷି ନିଜର ଜୀବିକା ହରାଇ ଥିବା ବେଳେ ମହାନଦୀ ମିଶନ ମଧ୍ୟ ଫେଲ୍ ମାରିଛି l ଅନ୍ୟପଟେ ନୟାଗଡ଼ ଜିଲ୍ଲାବାସୀଙ୍କ ପାନୀୟ ଜଳଯୋଗାଣ ପାଇଁ ନିର୍ମାଣ ଚାଲିଥିବା ମେଗା ପ୍ରକଳ୍ପ କାର୍ଯ୍ୟକାରିକୁ ନେଇ ମଧ୍ୟ ଉଠିଛୁ ପ୍ରଶ୍ନ । ଯାହାର ପ୍ରଭାବ ନୟାଗଡ଼ ଜିଲ୍ଲାରେ ପଡୁଛି।
ଉପର ମୁଣ୍ଡରେ ଛତିଶଗଡ଼ର କଲମା ବ୍ୟାରେଜ ନିର୍ମାଣ ପରେ ନୟାଗଡ଼ ଜିଲ୍ଲାର ଏକର ଏକର ଚାଷ ଜମି ପଡିଆ ପଡିଥିବା ବେଳେ ଜୀବିକା ହରାଇଛନ୍ତି ଜିଲ୍ଲାର ଚାଷୀମାନେ l ଯେଉଁ ସ୍ଥାନରେ ଜୁନ ଜୁଲାଇ ମାସରେ 7 ରୁ 8 ଫୁଟ ପାଣି ରୁହେ ସେଠି ଏବେ ଏପ୍ରିଲ ପହିଲାରୁ 2 ରୁ 3 ଫୁଟ ପାଣି ଦେଖିବାକୁ ମିଳୁଛି । ଜିଲ୍ଲାର ଗଣିଆ, କଣ୍ଟିଲୋ, ସିଧାମୂଳା ଅଞ୍ଚଳ ଦେଇ ମହାନଦୀ ବହୁଛି l ଏଠାକାର ସ୍ଥାନୀୟ ଚାଷମାନେ ବର୍ଷ ତମାମ ଚାଷ କରିଥାନ୍ତି l ମାତ୍ର ଏବେ ହାତବାନ୍ଧି ବସିଛନ୍ତି l ପନିପରିବା ଚାଷ ପୁରାପୁରି ଠପ ହୋଇଯାଇଛି l
ନୟାଗଡ଼ରୁ ଜୟେନ୍ଦ୍ର ବେହେରା, ଇଟିଭି ଭାରତ
