ନୟାଗଡ଼: ଚାଷୀଙ୍କୁ ମିଳୁନି ସାର କିନ୍ତୁ ଚାଲିଛି କଳାବଜାରୀ । ଏହାକୁ ନେଇ ନୟାଗଡ଼ ଜିଲ୍ଲା ରଣପୁରରେ ଚାଷୀ ରାସ୍ତାରୋକ କରିଛନ୍ତି l ଫଳରେ ରଣପୁର-ନୟାଗଡ଼ ଜଗନ୍ନାଥ ସଡ଼କରେ ଗାଡ଼ିମୋଟର ଯାତାୟାତ ବାଧାପ୍ରାପ୍ତ ହୋଇଥିଲା l
ସକାଳ 10 ଘଟିକା ସମୟରେ ରଣପୁର ସାର ବିକ୍ରୟ କେନ୍ଦ୍ରରୁ ସାର ନେବା ପାଇଁ ଆସିଥିଲେ ଶହ ଶହ ଚାଷୀ l କିଏ ରାତି ଅଧରୁ ଲାଇନ କରି ଛିଡ଼ା ହୋଇଥିଲେ ତ ପୁଣି କିଏ ସକାଳୁ ଆସି ସାର ନେବା ପାଇଁ ଲାଇନରେ ଛିଡ଼ା ହୋଇଥିଲେ । କିନ୍ତୁ ସାର ମିଳିବା ତ ଦୂରର କଥା ସାର ବିକ୍ରୟ କେନ୍ଦ୍ରର ଗେଟ ଖୋଲି ନଥିଲା କି କର୍ମଚାରୀଙ୍କ ଦେଖା ମିଳିନଥିଲା l
ଫଳରେ ଚାଷୀଙ୍କ ମଧ୍ୟରେ ଉତ୍ତେଜନା ପ୍ରକାଶ ପାଇବା ସହ ଉତ୍ୟକ୍ତ ଚାଷୀମାନେ ରାସ୍ତାରୋକ କରିଥିଲେ l ସାରର କଳାବଜାରୀ ବନ୍ଦ କରିବା ଏବଂ ଚାଷୀଙ୍କୁ ସାର ପ୍ରଦାନ କରିବା ପାଇଁ ଜିଲ୍ଲାପାଳ ଏହି ଦିଗରେ ଦୃଷ୍ଟି ଦେବା ପାଇଁ ଦାବି କରିଥିଲେ l ପରେ ରଣପୁର ପୋଲିସ ଖବର ପାଇ ଘଟଣାସ୍ଥଳରେ ପହଞ୍ଚି, ଉତ୍ୟକ୍ତ ଚାଷୀଙ୍କୁ ବୁଝାସୁଝା କରିବା ପରେ ରାସ୍ତାରୋକ ହଟିଥିଲା l
ନୟାଗଡ଼ରୁ ଜୟେନ୍ଦ୍ର ବେହେରା, ଇଟିଭି ଭାରତ
