ନୟାଗଡ଼: ଚାରିଆଡେ ତାଣ୍ଡବ ରଚୁଛି ଫନି । ନୟାଗଡ଼ ସହର ଲକ୍ଷଣ ନଗର, ଦେଉଳପଲି, ହନୁମାନ ନଗରରେ ବର୍ଷା ପାଣି ଯୋଗୁଁ ଘରୁ ବାହାରକୁ ବହାରି ପାରୁନାହାନ୍ତିଁ ଲୋକେ । ରାସ୍ତା ଉପରେ ତିନି ଫୁଟର ପାଣି ଚାଲୁଥିବା ଜଣାପଡିଛି ।
ତେବେ ନୟାଗଡ଼ ସହରର ସବୁ ପାଣି ଏଇ ରାସ୍ତା ଦେଇ ଯାଉଥିବାରୁ ଓ ଡ୍ରେନ ଉପରେ ଘର ନିର୍ମାଣ ଯୋଗୁଁ ଏଭଳି ଅବସ୍ଥା ହୋଇଥିବା ଜଣାପଡିଛି । ସେପଟେ ଗଛ ଉପୁଡି ଭାପୁର ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରରେ ଆମ୍ବୁଲାନ୍ସ ଗାଡି ବାହାରକୁ ବହାରିପାରୁନି । ଫଳରେ ସ୍ବାସ୍ଥ୍ୟ ସେବା ବନ୍ଦ ରହିଛି ।
ଏହାସହ ଗଛ ପଡି ଖଣ୍ଡପଡା ଭାପୁର ରାସ୍ତା ଅବରୋଧ ହୋଇଯାଇଛି । ପ୍ରବଳ ବର୍ଷା ସହ ପବନ ବହିବା ଯୋଗୁଁ ବଡ଼ ବଡ଼ ଗଛ ଉପୁଡି ରାସ୍ତା ଉପରେ ପଡି ରହିଛି । ତେବେ ଖଣ୍ଡପଡାର ଯୁବରାଜ ତଥା ବିଜେପି ନେତା ସିଦ୍ଧାର୍ଥ ସିଂ ତାଙ୍କ ସମର୍ଥକଙ୍କ ସହ ପହଞ୍ଚି ଗଛ କାଟି ରାସ୍ତାରୁ ହଟେଇଥିଲେ । ଯାହା ଫଳରେ ଗମନାଗମନ ସ୍ବାଭାବିକ ହୋଇଥିଲା ।
ନୟାଗଡ଼, ଖଣ୍ଡପଡାରେ ଏକ ବୋଲେରୋ ଉପରେ ଗଛ ଭାଙ୍ଗି ପଡିଛି । ସେହିପରି ଅନେକ ସ୍ଥାନରେ ଗଛ ଭାଙ୍ଗି ପଡିଛି । କଣ୍ଟିଲୋ, ଭାପୁର, ଗଣିଆ ଅଞ୍ଚଳକୁ ଯୋଗାଯୋଗ ବିଛିନ୍ନ ହୋଇଯାଇଛି ।
ନୟାଗଡରୁ ଉତ୍ପଳ ସାହୁ, ଇଟିଭି ଭାରତ
