ନୟାଗଡ: ବିଜେଡି ନେତା ଗୟାଧର ପରିଡ଼ାଙ୍କ ବିରୋଧରେ ତେଜୁଛି ଗିରଫ ଦାବି l ଏନେଇ ଆଦିବାସୀ ଦଳିତ ମହାସଂଘ ତରଫରୁ ଧାରଣା ତୃତୀୟ ଦିନରେ ପହଞ୍ଚିଛି । ଗୁରୁବାର ନୟାଗଡ ଜିଲ୍ଲାପାଳଙ୍କ ସହ ଦଳିତ ଆଦିବାସୀ ମହାସଂଘ ମଧ୍ୟରେ ଆଲୋଚନା ବିଫଳ ହେବାରୁ ଧାରଣା ଜାରି ରହିଛି ।
ସୂଚନା ଅନୁସାରେ, ନୟାଗଡ ଜିଲ୍ଲା ବ୍ଲକ ଅଧ୍ୟକ୍ଷାଙ୍କ ଜାଲ ଦସ୍ତଖତ କରି ମିଥ୍ୟା ବିଲ ମାଧ୍ୟମରେ ୮୦ କୋଟିରୁ ଅଧିକ ଟଙ୍କା ବ୍ଲକ ଉପାଧ୍ୟକ୍ଷ ତଥା ବିଜେଡି ନେତା ଗୟାଧର ପରିଡ଼ା ଲୁଟ କରିଥିବା ଅଭିଯୋଗ ହୋଇଥିଲା । ଏହାର ଅଭିଯୋଗ ପାଇବା ପରେ ଜିଲ୍ଲାପାଳ ଉପଜିଲ୍ଲାପାଳଙ୍କୁ ତଦନ୍ତ ନିର୍ଦ୍ଦେଶ ଦେଇଥିଲେ । ଇତି ମଧ୍ୟରେ ଉପଜିଲ୍ଲାପାଳ ଏହାର ତଦନ୍ତ କରି ଜାଲ ଦସ୍ତଖତ ହୋଇଥିବା ଜାଣିବାକୁ ପାଇଥିଲେ ।
୨୦୧୮ରୁ ୨୦୨୧ ପର୍ଯ୍ୟନ୍ତ ଜାଲ ଦସ୍ତଖତ କରାଯାଇ ବହୁ ନକଲି ନଥି ପ୍ରସ୍ତୁତ ହୋଇଛି ବୋଲି ନୟାଗଡ଼ ଉପଜିଲ୍ଲାପାଳ ଲଗ୍ନଜିତ ରାଉତ ଜିଲ୍ଲାପାଳ ପୋମା ଟୁଡୁଙ୍କୁ ଜଣାଇଛନ୍ତି । ଏନେଇ ଉପଜିଲ୍ଲାପାଳ ଗଣମାଧ୍ୟମ ଆଗରେ ସ୍ପଷ୍ଟ ମତ ରଖିଥିଲେ । ଏସବୁ ପରେ ବି ସମ୍ପୃକ୍ତ ନେତାଙ୍କ ଉପରେ ଜିଲ୍ଲାପାଳ କାର୍ଯ୍ୟାନୁଷ୍ଠାନ ନ ନେବାରୁ ଦଳିତ ଆଦିବାସୀ ମହାସଂଘ ତରଫରୁ ଧାରଣା ଜାରି ରହିଛି l
ନୟାଗଡରୁ ଜୟେନ୍ଦ୍ର ବେହେରା,ଇଟିଭି ଭାରତ
