ନବରଙ୍ଗପୁର: ସ୍ଥାନୀୟ ଡାବୁଗାଁ ଥାନା ଅନ୍ତର୍ଗତ କୁମ୍ଭାରଗୁଡାର ଜଣେ ଯୁବକ ଏକ ନିମ୍ବ ଗଛରେ ବେକରେ ଗାମୁଛା ଦେଇ ଆତ୍ମହତ୍ୟା କରିଥିବା ଦେଖାଯାଇଛି । ଯୁବକ ଜଣକ ଉଦ୍ଧବ ଭତ୍ରା (22) ବୋଲି ଜଣା ପଡିଛି । ଯୁବକଙ୍କ ବାପା ପୂର୍ଣ୍ଣ ଭତ୍ରା ଶନିବାର ଡାବୁଗାଁ ଥାନାରେ ଏତଲା ଦେବା ପରେ ପୋଲିସ ମୃତଦେହକୁ ଜବତ କରି ଏକ ଅପମୃତ୍ୟୁ ମାମଲା ରୁଜୁ କରିଛି । ଡାବୁଗାଁ ଥାନା ସୀଙ୍ଗସାରି ଫାଣ୍ଡି ଅନ୍ତର୍ଗତ କୁମ୍ଭାରଗୁଡ଼ାର ଉଦ୍ଧବ ଶୁକ୍ରବାର ନିକଟସ୍ଥ ଘୋଡ଼ାଖୁଣ୍ଟା ଗ୍ରାମରେ ନିଜ ଶ୍ଵଶୁର ମହାଦେବ ଭତ୍ରାଙ୍କ ଘରକୁ ଯାଇଥିଲା ।
ଶନିବାର ଶୌଚ ପାଇଁ ଯିବାକୁ କହି ସେ ସକାଳୁ ଘରୁ ବାହାରିଥିବା ପରିବାର ଲୋକେ କହିଥିଲେ । ହେଲେ ଗାଁରୁ ଗୋଟିଏ କିଲୋମିଟର ଦୂର ମେଞ୍ଜୋର ରାସ୍ତାରେ ଥିବା ଏକ ନିମ୍ବ ଗଛରେ ବେକରେ ଗାମୁଛା ଦେଇ ସେ ଆତ୍ମହତ୍ୟା କରିଥିଲା । ଶନିବାର ସ୍ଥାନୀୟ ଲୋକେ ଉଦ୍ଧବର ଝୁଲନ୍ତା ମୃତଦେହ ଦେଖିବା ପରେ ପରିବାର ଲୋକଙ୍କୁ ଖବର ଦେଇଥିଲେ ।
ଖବର ପାଇ ମୃତ ଉଦ୍ଧବଙ୍କ ବାପା ଏନେଇ ସୀଙ୍ଗସାରି ଫାଣ୍ଡି ଏଏସଆଇ କୈଳାସ ଚନ୍ଦ୍ର ବେହେରାଙ୍କୁ ଏତଲା ଦେଇଥିଲେ । ଏହାପରେ ଫାଣ୍ଡି ଅଧିକାରୀ ମୃତଦେହ ଜବତ କରି ଏକ ଅପମୃତ୍ୟୁ ମାମଲା ନଂ 06/20 ରୁଜୁ କରି ମୃତଦେହ ବ୍ୟବଚ୍ଛେଦ କରିବାକୁ ପଠାଇଥିଲେ । ପରେ ପରିବାର ଲୋକଙ୍କୁ ଉଦ୍ଧବଙ୍କ ମୃତଦେହ ହସ୍ତାନ୍ତର କରାଯାଇଛି । ତେବେ ବର୍ତ୍ତମାନ ସୁଦ୍ଧା ମୃତ୍ୟୁର କାରଣ ଅସ୍ପଷ୍ଟ ଥିବା ବେଳେ ଏହାର ତଦନ୍ତ ଜାରି ରହିଥିବା ପୋଲିସ ଏଏସଆଇ କୈଳାଶ ଚନ୍ଦ୍ର ବେହେରା କହିଛନ୍ତି ।
ନବରଙ୍ଗପୁରରୁ ତପନ କୁମାର ବିଷୋୟୀ, ଇଟିଭି ଭାରତ
