ନବରଙ୍ଗପୁର: ନବରଙ୍ଗପୁର ଜିଲ୍ଲା ଚନ୍ଦାହାଣ୍ଡି ସଡକ ଦୁର୍ଘଟଣାରେ ୨ ଶିଶୁ ମୃତ ଘଟଣାରେ ଆଜି ଏକ ନୂଆ ମୋଡ ନେଇଛି । ଆଜି ଆଉ ଜଣକର ମୃତଦେହ ଗାଁରେ ପହଞ୍ଚିବା ପରେ ଗାଁରେ ଉତ୍ତେଜନା ପ୍ରକାଶ ପାଇଥିଲା ।
ଶିଶୁର ମୃତଦେହକୁ କଂଗ୍ରେସ ନେତା କ୍ଷମରାଜ ବାଘ, ସନ୍ତୋଷ ପଟ୍ଟନାୟକ, ହୁମେଶ୍ବର ହଂସ, କେଦାର ପୂଜାରୀ ପ୍ରମୁଖ ଶତାଧିକ ଲୋକ ପ୍ରାୟ ଅଢ଼େଇ କିଲୋମିଟର ବୋହି ଆଣି ଚନ୍ଦାହାଣ୍ଡି ବସଷ୍ଟାଣ୍ଡ ନିକଟରେ ମୁଖ୍ୟ ରାସ୍ତା ଉପରେ ମୃତଦେହ ରଖି ରାସ୍ତା ଅବରୋଧ କରିଛନ୍ତି ।
ମୃତକଙ୍କ ପରିବାରକୁ ୧୦ ଲକ୍ଷ ଟଙ୍କା କ୍ଷତିପୁରଣ ଦାବି କରାଯାଇଛି । କ୍ଷତିପୁରଣ ନମିଳିବା ପର୍ଯ୍ୟନ୍ତ ଆନ୍ଦୋଳନ ଚାଲୁ ରହିବ ବୋଲି କୁହାଯାଇଛି । ରାସ୍ତା ଉପରେ ମୃତଦେହ ରଖିବା ଫଳରେ ରାସ୍ତାର ଉଭୟ ପାର୍ଶ୍ବରେ ଗାଡି ମୋଟର ଅଟକି ରହିଛି ।
ପ୍ରକାଶ ଥାଉକି, ଗତ କାଲି ଜଣେ ମୃତକ ଶିଶୁ ନନ୍ଦିନିର ମୃତଦେହ ଗାଁରେ ପହଞ୍ଚିବା ପରେ ତାଙ୍କ ଘର ଆଗରେ ରଖି ଗ୍ରାମବାସୀ ପ୍ରତିବାଦ କରିଥିଲେ । ପରବର୍ତ୍ତୀ ଅବସ୍ଥାରେ ପ୍ରଶାସନ ପକ୍ଷରୁ ଉତ୍ତ୍ୟକ୍ତ ଜନସାଧାରଣଙ୍କୁ ବୁଝାସୁଝା କରିବା ପରେ ରାସ୍ତା ଉପରୁ ମୃତଦେହକୁ ଉଠାଇଥିଲେ ।
ତେବେ ଜିଲ୍ଲା ପାଳଙ୍କ ସହ ଫୋନରେ ଆଲୋଚନା ପରେ ମୃତକ ପରିବାରକୁ ତିନି ଲକ୍ଷ ଟଙ୍କା ପନ୍ଦର ଦିନ ମଧ୍ୟରେ ପ୍ରଦାନ କରାଯିବ ବୋଲି ତହସିଲଦାର ହୃଦାନନ୍ଦସିଂ ମାଝୀ ଲିଖିତ ଭାବେ ଦେବା ପରେ ଆନ୍ଦୋଳନରୁ ଓହରି ଥିଲେ । ଯଦି ପନ୍ଦର ଦିନ ମଧ୍ୟରେ କ୍ଷତି ପୂରଣ ନଦେଲେ ପୁନର୍ବାର ଆନ୍ଦୋଳନକୁ ତୀବ୍ରତର କରାଯିବ ବୋଲି କଂଗ୍ରେସ ନେତା କ୍ଷେମରାଜ ବାଘ ଚେତାବନୀ ଦେଇଛନ୍ତି ।
ନବରଙ୍ଗପୁରରୁ ତପନ କୁମାର ବିଷୋୟୀ, ଈଟିଭି ଭାରତ
