ନବରଙ୍ଗପୁର : ରାସ୍ତା ନ ଥିବାରୁ ଆସିପାରିଲାନି ଆମ୍ବୁଲାନ୍ସ,ବାଇକରେ ବୁହାହୋଇ ଗଲେ ପ୍ରସୂତି । ନବରଙ୍ଗପୁର ଜିଲ୍ଲା ଚନ୍ଧାହାଣ୍ଡି ବ୍ଲକ ଭୋଜପୁର ଗାଁରେ ପୁଣି ସାମ୍ନାକୁ ଆସିଛି ଜନନୀ ଯନ୍ତ୍ରଣାର ଦୃଶ୍ୟ । ସୂଚନା ଅନୁସାରେ,ଭୋଜପୁର ଗାଁର ଚିନ୍ଧାପଡା ସାହିର ବସୁବାଘଙ୍କ ଝିଅ ନମିତା ରବିବାର ରାତିରେ ପ୍ରସବ ବେଦନା ହୋଇଥିଲା । ଚନ୍ଧାହାଣ୍ଡି ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରକୁ ନେବା ପାଇଁ ଆମ୍ବୁଲାନ୍ସକୁ ଫୋନ କରିଥିଲେ ପରିବାର ଲୋକେ । ହେଲେ, ଚିନ୍ଧାପଡା ଯିବାକୁ କୈଣସି ରାସ୍ତା ନ ଥିବା ଯୋଗୁଁ ଆମ୍ବୁଲାନ୍ସ ଗର୍ଭବତୀଙ୍କ ଘରକୁ ଯାଇ ନ ପାରି ମୁଖ୍ୟ ରାସ୍ତାରେ ଅଟକି ରହିଥିଲା ।
ଅନ୍ୟ ଉପାୟ କିଛି ନପାଇ ପରିବାର ଲୋକେ ବିଲ ମଧ୍ୟ ଦେଇ ବାଇକରେ ଆମ୍ବୁଲାନ୍ସ ନିକଟରେ ପହଞ୍ଚାଇ ଥିଲେ । ପ୍ରସୂତିଙ୍କୁ ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରରେ ଭର୍ତ୍ତି କରିଥିଲେ । ସେଠାରେ ପ୍ରସୂତି ଏକ ଶିଶୁ ପୁତ୍ରକୁ ଜନ୍ମ ଦେଇଥିଲେ । ତେବେ ସାହିକୁ ରାସ୍ତା ନିର୍ମାଣ ସକାଶେ ବାରମ୍ବାର ସ୍ଥାନୀୟବାସୀ ସାଂସଦ ଓ ବିଧାୟକଙ୍କୁ ଗୁହାରୀ କରିଥିଲେ ମଧ୍ୟ କିଛି ଲାଭ ମିଳୁନଥିବା ଅଭିଯୋଗ ହୋଇଛି ।
ନବରଙ୍ଗପୁରରୁ , ତପନ କୁମାର ବିଷୟୀ ଇଟିଭି ଭାରତ
