ନବରଙ୍ଗପୁର: ରାଜ୍ୟର ହସ୍ତତନ୍ତ ଓ ବୟନ ଶିଳ୍ପମନ୍ତ୍ରୀ ପଦ୍ମିନୀ ଦିଆନ ଦୁର୍ଘଟଣାର ଶିକାର ହୋଇଥିବା ବ୍ୟକ୍ତିଙ୍କୁ ଡାକ୍ତରଖାନାରେ ପହଞ୍ଚାଇ ମାନବିକତା ଦେଖାଇଛନ୍ତି । ମନ୍ତ୍ରୀ ନିଜ ଅଞ୍ଚଳ କୋଟପାଡ ଫେରିବା ରାସ୍ତାରେ ଏହି ଘଟଣା ଘଟିଥିବା ଜଣାପଡିଛି ।
ମିଳିଥିବା ସୂଚନା ଅନୁସାରେ ଡାବୁଗାଁ ବ୍ଲକ ଘୋଡାଖୁଣ୍ଟା ପଞ୍ଚାୟତ ଅଧିନ କାହାକଗୁଡା ଗ୍ରାମର ଦେବସିଂ ଭତ୍ରା କୌଣସି କାରଣରୁ ଡାବୁଗାଁ ଆସି ନିଜ ଗ୍ରାମକୁ ଫେରିବା ବାଟରେ ମାଝିଗୁଡା କ୍ରସର ନିକଟରେ ଏକ ଅଜଣା ଗାଡି ଧକ୍କା ଦେଇଥିଲା । ଫଳରେ ସେ ରାସ୍ତା ଉପରେ ଆହତ ଅବସ୍ଥାରେ ପଡ଼ିରହିଥିଲେ । ବୟନ ଶିଳ୍ପମନ୍ତ୍ରୀ ସେହି ସମୟରେ ଉକ୍ତ ରାସ୍ତା ଦେଇ ନିଜ ଅଞ୍ଚଳ କୋଟପାଡ଼କୁ ଫେରୁଥିଲେ । ଆଉ ବାଟରେ ଆହତ ଦେବସିଂଙ୍କୁ ଦେଖି ସେ ତୁରନ୍ତ ହସ୍ପିଟାଲ ନେବାକୁ ବ୍ୟବସ୍ଥା କରିଥିଲେ । ଆହତଙ୍କୁ ଅଗ୍ନିଶମ ଗାଡି ଦ୍ବାରା ସେ ଡାବୁଗାଁ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରକୁ ଆଣିଥିଲେ ଓ ଚିକିତ୍ସା କରାଇଥିଲେ । ସେଠାରେ ଦେବସିଂଙ୍କ ଅବସ୍ଥା ଗୁରୁତର ହେବାରୁ ତାଙ୍କୁ ଡାକ୍ତର ନବରଙ୍ଗପୁର ଜିଲ୍ଲା ମୁଖ୍ୟ ଚିକିତ୍ସାଳୟକୁ ପଠାଇଛନ୍ତି । ମନ୍ତ୍ରୀଙ୍କ ଏପରି କାର୍ଯ୍ୟକୁ ବୁଦ୍ଧିଜୀବୀମାନେ ସ୍ବାଗତ ଜଣାଇଛନ୍ତି ।
ନବରଙ୍ଗପୁରରୁ ତପନ କୁମାର ବିଷୋୟୀ, ଇଟିଭି ଭାରତ
