ନବରଙ୍ଗପୁର: ପିଲାଙ୍କ ମଧ୍ୟାହ୍ନ ଭୋଜନରେ ବିଷ ଦେଇ ମାରିବାକୁ ଉଦ୍ୟମ ଅଭିଯୋଗ । ସ୍କୁଲ ରୋଷେୟା ଅଟକାଇବାରୁ ଶିକ୍ଷୟିତ୍ରୀ ଜଣକ ତାଙ୍କୁ ଗାଳିଗୁଳଜ କରିବା ସହ ମାଡ ମାରିଥିବା ନେଇ ଅଭିଯୋଗ କରିଛନ୍ତି । ନବରଙ୍ଗପୁର ଜିଲ୍ଲା ଭାଟିସାଲଗୁଡା ବିଦ୍ୟାଳୟରୁ ଏଭଳି ଏକ ସାଂଘାତିକ ଅଭିଯୋଗ ସାମ୍ନାକୁ ଆସିଛି । ସ୍କୁଲରେ ମଧ୍ୟାହ୍ନ ଭୋଜନ ରୋଷେଇ ଚାଲିଥିବା ବେଳେ ଜଣେ ଶିକ୍ଷୟିତ୍ରୀ ମୂଷାମରା ଔଷଧ ପକାଇ ପିଲାଙ୍କ ଖାଦ୍ୟରେ ମିଶାଇବାକୁ ଧମକ ଦେଇଥିବା ନବରଙ୍ଗପୁର ଟାଉନ ଥାନାରେ ଲିଖିତ ଅଭିଯୋଗ ହୋଇଛି ।
ଘଟଣା ମୁତାବକ, ଶିକ୍ଷୟିତ୍ରୀ ରଚିତା ରାଉତ ଗତ ୨୧ ଡିସେମ୍ବର 2021ରେ ଡେପୁଟେସନରେ ଆସି ଭାଟିସାଳଗୁଡା ସ୍କୁଲରେ ନିଯୁକ୍ତି ହୋଇଥିଲେ। ସେହି ଦିନଠାରୁ ସେ ସ୍କୁଲରେ ପାଗଳାମି କରୁଥିବା ନେଇ ପ୍ରଧାନ ଶିକ୍ଷୟିତ୍ରୀ ଅଭିଯୋଗ କରିଛନ୍ତି । ଶିକ୍ଷୟିତ୍ରୀ ରଚିତା ବାରମ୍ବାର ଛୁଟିରେ ଯିବାକୁ ଚାହୁଁଥିଲେ, ମାତ୍ର ପ୍ରଧାନ ଶିକ୍ଷୟିତ୍ରୀ ଛୁଟି ନଦେବାରୁ ପିଲାଙ୍କ ଉପରେ ରାଗ ସୁଝାଇ ଥିଲେ ଏବଂ ପରେ ପରିଚାଳନା କମିଟି ପାଖରେ ଭୁଲ ମଧ୍ୟ ମାଗିଥିଲେ । ଏହାପରେ ମଧ୍ୟ ସୁଧୁରି ନଥିଲେ ରଚିତା । ମୋବାଇଲରେ ଲାଇଭ ଭିଡିଓ କରି ସମସ୍ତଙ୍କୁ ଡରାଉ ଥିଲେ । ଗୁରୁବାର ମଧ୍ୟ ଭିଡିଓ କରି ପିଲାଙ୍କ ପାଇଁ ଖାଦ୍ୟ ବଢ଼ା ଯାଉଥିବା ସମୟରେ ମୂଷା ମରା ଔଷଧ ଖାଦ୍ୟରେ ମିଶେଇ ସମସ୍ତଙ୍କୁ ମାରିବାର ଧମକ ଦେଇଥିଲେ । ରୋଷେୟା ଏହାକୁ ବିରୋଧ କରିବାରୁ ତାଙ୍କୁ ଗାଳି ଗୁଲଜ କରିବା ସହ ମାଡ଼ ମାରିଥିବା ନେଇ ରୋଷାୟା ଜଣକ ଅଭିଯୋଗ କରିଛନ୍ତି । ଏହି ଘଟଣା ନେଇ ସ୍କୁଲ ପରିଚାଳନା କମିଟି ଓ ଅନ୍ୟାନ୍ୟ କର୍ମଚାରୀ ନବରଙ୍ଗପୁର ଟାଉନ ଥାନାରେ ଅଭିଯୋଗ କରିଛନ୍ତି ।
ଅନ୍ୟପଟେ ଏଭଳି ଅଭିଯୋଗକୁ ଖଣ୍ଡନ କରିଛନ୍ତି ଶିକ୍ଷୟିତ୍ରୀ ରଚିତା । ଏପରିକି ସ୍କୁଲର ପ୍ରଧାନ ଶିକ୍ଷୟିତ୍ରୀଙ୍କ ବିରୋଧରେ ପାଲଟା ଅଭିଯୋଗ କରିଛନ୍ତି । ରଚିତା କହିଛନ୍ତି, " ପୂର୍ବ ଘଟଣାକୁ ନେଇ ପ୍ରଧାନ ଶିକ୍ଷୟିତ୍ରୀ ବାରମ୍ବାର ମୋତେ ଶାରିରୀକ ଏବଂ ମାନସିକ ନିର୍ଯାତନା ଦେଉଥିଲେ । ଦେହ ଅସୁସ୍ଥ ଥିଲେ ମଧ୍ୟ ଛୁଟି ପାଇଁ ଅନୁମତି ଦିଅନ୍ତି ନାହିଁ । ସ୍କୁଲରେ ପିଲାଙ୍କୁ କାମ କରାଉଥିବାରୁ ମୁଁ ଫୋନରେ ଏହା ରେକର୍ଡ କରିଥିଲି । ତେବେ ଏହି ଭିଡ଼ିଓ ଭାଇରାଲ ହେଲେ ଚାରିକିରୁ କାଢ଼ିଦେବେ ବୋଲି ପ୍ରଧାନ ଶିକ୍ଷୟିତ୍ରୀ ବାରମ୍ବାର ଧମକ ଦେଉଥିଲେ" । ଏହି ସମ୍ପର୍କରେ ସ୍କୁଲ କର୍ମଚାରୀ ଜିଲ୍ଲା ଶିକ୍ଷା ଅଧିକାରୀ ପ୍ରଦୀପ କୁମାର ନାଗଙ୍କ ସହ ଯୋଗାଯୋଗ କରିଛନ୍ତି । ତେଣୁ ଶୀଘ୍ର ଘଟଣାର ତଦନ୍ତ ପରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ଶିକ୍ଷା ଅଧିକାରୀ କହିଛନ୍ତି ।
ଇଟିଭି ଭାରତ, ନବରଙ୍ଗପୁର
