ନବରଙ୍ଗପୁର: ଜିଲ୍ଲାର ତେନ୍ତୁଳିଖୁଣ୍ଟି ଇନ୍ଦ୍ରାବତୀ ରାସ୍ତାର ତ୍ରୀନାଥ ମନ୍ଦିର ନିକଟରେ ସଡକ ଦୁର୍ଘଟଣା । ଦୁଇ ବାଇକ ମୁହାଁମୁହିଁ ଧକ୍କା ହେବା ଫଳରେ ଦୁଇଜଣଙ୍କ ମୃତ୍ୟୁ ହୋଇଛି । ମୃତକ ମାନେ ହେଲେ ତେନ୍ତୁଳିଖୁଣ୍ଟି ବ୍ଲକ ଅନ୍ତର୍ଗତ ପୂଜାରୀଗୁଡା ଗାଁର ଉମେଶ ମାଝୀ ଏବଂ ବଡ଼ ଡାଇଭଟ୍ଟାର ସମୀର ସୁନା ବୋଲି ଜଣାପଡିଛି ।
ସୂଚନାନୁଯାୟୀ, ପୂଜାରୀଗୁଡାର ଉମେଶ ମାଝୀ ଏକ ହୋଣ୍ଡା ୟୁନିକର୍ନ ବାଇକ ଯୋଗେ ନିଜ ପରିବା ବଗିଚାକୁ ଯାଉଥିଲେ । ତେବେ ଡାଇଭଟ୍ଟା ଗାଁର ସମୀର ସୁନା, ତପନ ସୁନା ଏବଂ ଏଡମିନ ଡ଼ଙ୍ଗରି ଏକ ପଲସର ବାଇକ ଯୋଗେ ଇନ୍ଦ୍ରାବତୀରୁ ନିଜ ଗାଁ ଅଭିମୁଖେ ଫେରୁଥିଲେ । ଏହି ସମୟରେ କୁର୍ମାକୋଟ ନିକଟରେ ଦୁଇ ବାଇକ ମଧ୍ୟରେ ମୁହାଁ ମୁହିଁ ଧକ୍କା ହୋଇଥିଲା ।
ଘଟଣାସ୍ଥଳରେ ସ୍ଥାନୀୟ ଲୋକଙ୍କ ସହଯୋଗରେ ତେନ୍ତୁଳିଖୁଣ୍ଟି ଡାକ୍ତରଖାନାରେ ଭର୍ତ୍ତି କରାଯାଥିଲେ ହେଁ ବାଇକ ଚାଳକ ସମୀର ସୁନା ଏବଂ ଉମେଶ ମାଝୀଙ୍କର ମୃତ୍ୟୁ ହୋଇଛି । ତେବେ ଏଡମିନ ଡ଼ଙ୍ଗରି ଏବଂ ତପନ ସୁନା ସାମାନ୍ୟ ଆହତ ହୋଇ ଚିକିତ୍ସା ହେଉଥିବା ବେଳେ ତାଙ୍କ ସ୍ବାସ୍ଥ୍ୟାବସ୍ଥା ଠିକଥିବା ଜଣାପଡିଛି ।
ତେନ୍ତୁଳିଖୁଣ୍ଟି ଆଇଆଇସି ପରମାନନ୍ଦ ସୁନାନୀ ଓ ଏସଆଇ ଅଭିମନ୍ୟୁ ଦୁର୍ଗା ଘଟଣାସ୍ଥଳରେ ପହଞ୍ଚି ତଦନ୍ତ ଜାରିରଖିଛନ୍ତି ।
ନବରଙ୍ଗପୁରରୁ ତପନ କୁମାର ବିଷୋୟୀ, ଇଟିଭି ଭାରତ
