ନବରଙ୍ଗପୁର: କୋଭିଡ କେୟାର ହସ୍ପିଟାଲ ପରିଦର୍ଶନରେ ଆସି ନବରଙ୍ଗପୁର ଉପ-ଜିଲ୍ଲାପାଳ ଭାସ୍କର ରାଇତା ହଟ୍ଟହଟା । ହସ୍ପିଟାଲ ଭିତରକୁ ପ୍ରବେଶ କରିବାକୁ ଜିଲ୍ଲାପାଳଙ୍କୁ ଦେଇନାହାନ୍ତି ସ୍ଥାନୀୟ ମହିଳା । ଏପରି ଘଟଣା ଘଟିଛି ନବରଙ୍ଗପୁର ଜିଲ୍ଲା ଉମରକୋଟ ମୁନିସିପାଲିଟିର 13 ନଂ ୱାର୍ଡରେ ।
ଉମରକୋଟ ମୁନିସିପାଲଟିର 13ନଂ ୱାର୍ଡ ଏକ ଜନଗହଳିପୂର୍ଣ୍ଣ ସ୍ଥାନ । ଏହି ୱାର୍ଡରେ ଏକ ବାତ୍ୟା ଆଶ୍ରୟ ସ୍ଥଳୀ ରହିଛି । ତେବେ ଏହା ବ୍ୟବହୃତ ହେଉ ନଥିବାରୁ ନବରଙ୍ଗପୁର ଜିଲ୍ଲା ପ୍ରଶାସନ ଏହି ବାତ୍ୟା ଆଶ୍ରୟସ୍ଥଳୀକୁ କୋଭିଡ କେୟାର ହସ୍ପିଟାଲ ଘୋଷଣା କରିଛି ।
କୋଭିଡ ହସ୍ପିଟାଲ ଘୋଷଣା ହେବାପରେ ସ୍ଥାନୀୟ ଲୋକେ ଭୟଭୀତ ହେବା ସହ ଉପଜିଲ୍ଲାପାଳ ଗସ୍ତ ସମୟରେ ବାତ୍ୟା ଆଶ୍ରୟ ସ୍ଥଳୀ ଆଗରେ ଜଗି ବସିଥିଲେ । ପରେ ସ୍ଥାନୀୟ ବାସିନ୍ଦା ଓ ଉପଜିଲ୍ଲାପାଳଙ୍କ ମଧ୍ୟରେ ଦୀର୍ଘ ସମୟ ଧରି କଥା କଟାକଟି ହୋଇଥିଲା । ଏହାପରେ ବିରକ୍ତ ହୋଇ ଉପଜିଲ୍ଲାପାଳ ଚାଲି ଯାଇଥିଲେ । ତେବେ ଆଗାମୀ ଦିନରେ ସ୍ଥାନୀୟ ଲୋକେ ଏହାର ପ୍ରତିବାଦ କରିବାକୁ ନିଷ୍ପତି ନେଇଛନ୍ତି ।
ନବରଙ୍ଗପୁରରୁ ତପନ କୁମାର ବିଷୋୟୀ, ଇଟିଭି ଭାରତ
