ନବରଙ୍ଗପୁର: ପରିବାର ଲୋକ ସାଜିଲେ ଦଲାଲ । ୩ ଲକ୍ଷ ଟଙ୍କାରେ ସୁଦୂର ହରିୟାଣାରେ ଘର ଲୋକେ ବିକ୍ରୀ କରିଥିବା ଅଭିଯୋଗ ଆଣିଲେ ନାବାଳିକା ।
ଯୁବତୀ ହରିୟାଣାରେ ଦୀର୍ଘ ଛଅ ମାସ ଧରି ନିର୍ଯ୍ୟାତିତ ହେବା ପରେ ନବରଙ୍ଗପୁର ପ୍ରଶାସନ ନିକଟରେ ଗ୍ରାମର ଜଣେ ସ୍ବେଚ୍ଛାସେବୀଙ୍କଠାରୁ ଖବର ପାଇଁ ପ୍ରଶାସନ ଉକ୍ତ ନାବାଳିକାଙ୍କୁ ଉଦ୍ଧାର କରି ସୁଧାର ଗୃହରେ ରଖିଛି । ନବରଙ୍ଗପୁର ଜିଲ୍ଲା ପାପଡାହାଣ୍ଡି ବ୍ଲକ ସେମଳା ଗ୍ରାମର ନାବାଳିକାଙ୍କ ନିଜ ପରିବାର ଲୋକଙ୍କ ବିରୋଧରେ ଅଭିଯୋଗ ଆଣିବା ପରେ ଜିଲ୍ଲାରେ ଚାଞ୍ଚଲ୍ୟ ଖେଳାଇଦେଇଛି । ଆଦିବାସୀ ଅଧ୍ୟୁଷିତ ଜିଲ୍ଲାରେ ମାନବ ଚାଲାଣ ରାକେଟ ସକ୍ରିୟ ଥିବା ନେଇ ଗୁମର ଫିଟିଛି ।
ଝିଅଙ୍କ ବୟାନ ଅନୁସାରେ ଗତ କିଛି ମାସ ପୂର୍ବେ ନିଜ ମାଆ, ବାପା, ଭଉଣୀ, ଜ୍ବାଇଁ ଅନ୍ୟ କିଛି ପାରିବାରିକ ସମ୍ପର୍କୀୟଙ୍କ ସହ ମିଶି ତାଙ୍କୁ ହରିୟାଣାର ଏକ ଯୁବକ ସହିତ ବିବାହ କରିବାକୁ ଜିଦ୍ କରିଥିଲେ ।
ତେବେ ହରିୟାଣାରେ ସେହି ଯୁବକଙ୍କର ପ୍ରଚୁର ସମ୍ପତ୍ତି,ସହ ଭଲ ରଜଗାର ଥିବା ନେଇ ଭବିଷ୍ୟତର ସୁନେଲି ସ୍ବପ୍ନ ଦେଖାଇ ପରିବାର ଲୋକଙ୍କ ଝିଅକୁ ସେହି ଯୁବକ ସହିତ ବିବାହ କରିବାକୁ ଜିଦ୍ ଧରିଥିଲେ । ପରିବାର ଲୋକଙ୍କ କଥାରେ ଯୁବତୀ ରାଜି ନହେବାରୁ ତାକୁ ପ୍ରବଳ ମାଡ଼ ମାରିବା ସହିତ ତାକୁ ଛୁରା ଦେଖାଇ ସେହି ଯୁବକ ସହିତ ସୁଦୂର ହରିୟାଣାକୁ ପଠାଇ ଦେଇଥିଲେ । ତେବେ ହରିୟାଣା ଯିବାପରେ ଯୁବତୀଙ୍କୁ ସେହି ଯୁବକ ଶାରୀରିକ, ମାନସିକ ନିର୍ଯ୍ୟାତନା ଦେଇଥିଲେ । ଝିଅ ତାକୁ ଛାଡି ଦେବାପାଇଁ ଗୁହାରି କରିବା ପରେ ଝିଅକୁ ତା ପରିବାର ଲୋକଙ୍କୁ ତିନି ଲକ୍ଷ ଟଙ୍କା ଦେଇ କିଣିଥିବା ନେଇ ପ୍ରକାଶ କରିବା ସହ ସେହି ତିନି ଲକ୍ଷ ଟଙ୍କା ଫେରସ୍ତ କରି ଚାଲିଯିବାକୁ କହିଥିଲେ ।
ଝିଅ ତିନି ଲକ୍ଷ ଟଙ୍କାରେ ବିକ୍ରି କରି ଦେଇଥିବା ନେଇ ନିଜ ପରିବାର ଲୋକଙ୍କୁ ଫୋନ ଦ୍ବାରା ବୁଝିବା ପରେ ପରିବାର ଲୋକେ ତା କଥାକୁ କର୍ଣ୍ଣପାତ ନକରିବାରୁ ସେ ଗ୍ରାମର ଜଣେ ବ୍ୟକ୍ତିଙ୍କ ସାହାଯ୍ୟ ନେଇ ନବରଙ୍ଗପୁର ଏସପିଙ୍କୁ ଘଟଣା ବାବଦରେ ଜଣାଇଥିଲେ ।
ପରେ ନବରଙ୍ଗପୁର ପୋଲିସ ଓ ହରିୟାଣା ପୋଲିସ ଦ୍ବାରା ଯୁବତୀ ଉଦ୍ଧାର ହୋଇଥିବା ନେଇ ପ୍ରକାଶ କରିଛନ୍ତି । ଯୁବତୀ ନିଜ ପରିବାର ଲୋକଙ୍କ ବିରୋଧରେ ବିଷୋଦଗାର କରିଛନ୍ତି । ଅପରପକ୍ଷରେ ଯୁବତୀଙ୍କ ଅଭିଯୋଗକୁ ଖଣ୍ଡନ କରିଛନ୍ତି । ଯୁବତୀ ମିଥ୍ୟା ଅଭିଯୋଗ ଆଣିଥିବା ନେଇ ଯୁବତୀଙ୍କ ପରିବାର ଲୋକେ ପ୍ରକାଶ କରିଛନ୍ତି ।
ଯୁବତୀକୁ ହରିୟାଣାରୁ ଉଦ୍ଧାର କରିବା ପରେ ନବରଙ୍ଗପୁର ସୁଧାର ଗୃହରେ ରଖାଯାଇ ତାହାର ଯତ୍ନ ନୂଆଯାଉଥିବା ସହ ଶିକ୍ଷାଗତ ଯୋଗ୍ୟତା ଅନୁସାରେ ତାକୁ ଚାକିରି ଯୋଗାଇଦେବାପାଇଁ ପ୍ରଶାସନ ଦ୍ବାରା ପ୍ରକ୍ରିୟା ଆରମ୍ଭ ହୋଇଥିବା ନେଇ ଜିଲ୍ଲା ଶିଶୁ ସୁରକ୍ଷା ଅଧିକାରୀ ପ୍ରକାଶ କରିଛନ୍ତି ।
ନବରଙ୍ଗପୁରରୁ ତପନ ବିଷୋୟୀ, ଇଟିଭି ଭାରତ
