ନବରଙ୍ଗପୁର: ବଜ୍ରପାତ ଘଟି ଜଣେ ମହିଳା ଆହତ, ୨ ଗୋରୁ ମୃତ । ନବରଙ୍ଗପୁର ଜିଲ୍ଲା ତେନ୍ତୁଳିଖୁଣ୍ଟି ବ୍ଲକ୍ ଅଁଳାଭଟ୍ଟା ପଞ୍ଚାୟତ ଡେଙ୍ଗାଗୁଡ଼ା ଗାଁରେ ଘଟିଛି ଏହି ଅଘଟଣ ।
ଆଜି ପବନ ବୋହିବା ସହ ଘଡ଼ଘଡି଼ ସାଙ୍ଗକୁ ବର୍ଷା ହୋଇଥିଲା । ଡେଙ୍ଗାଗୁଡ଼ା ଗ୍ରାମର ଅନାଶୁ ଜାନିଙ୍କ ଘର ପାଖରେ ହଠାତ୍ ବଜ୍ରପାତ ହେବାରୁ ଖଳାରେ ବନ୍ଦା ହୋଇଥିବା ତାଙ୍କର ୨ଟି ଗୋରୁଙ୍କ ଘଟଣାସ୍ଥଳରେ ହିଁ ମୃତ୍ୟୁ ହୋଇଥିଲା । ଅନ୍ୟ ଜଣେ ବିଳାସି ନାୟକ ନାମକ ମହିଳା ଆହତ ହୋଇଛନ୍ତି । ଆହତ ମହିଳା ଜଣଙ୍କୁ 108 ଆମ୍ବୁଲାନ୍ସ ଯୋଗେ ପାପଡାହାଣ୍ଡି ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରରେ ଭର୍ତ୍ତି କରାଯାଇଛି l
ସୂଚନା ଅନୁଯାୟୀ ଡେଙ୍ଗାଗୁଡା ଗ୍ରାମର ଅନାଶୁ ଜାନି ଋଣ ଓ କୁଲି ମଜୁରୀ କରି ଚାଷ କାର୍ଯ୍ୟ ଆରମ୍ଭ ପୂର୍ବରୁ 12 ହଜାରରୁ ଊର୍ଦ୍ଧ୍ବ ଟଙ୍କାରେ ଦୁଇଟି ଗୋରୁ କିଣିଥିଲେ । ନିଜ ଚାଷ ଜମି କାର୍ଯ୍ୟରେ ଗୋରୁଙ୍କୁ ବ୍ୟବହାର ସହିତ ଅନ୍ୟ ଲୋକଙ୍କ ଚାଷ ଜମିରେ ହଳ କରି ଦୁଇ ପଇସା ରୋଜଗାର ଆଶା ରଖିଥିଲେ । କିନ୍ତୁ ଆଜି ବଜ୍ରାଘାତରେ ଦୁଇ ଗୋରୁଙ୍କ ଅକାଳ ବିୟୋଗ ହୋଇଯିବାରୁ ଅନାଶୁ ଜାନିଙ୍କ ପରିବାର ଏବେ ଭାଙ୍ଗି ପଡିଛନ୍ତି l ତେବେ ପ୍ରଶାସନ ପକ୍ଷରୁ ତୁରନ୍ତ କ୍ଷୟକ୍ଷତି ଆକଳନ କରାଯାଇ କ୍ଷତିଗ୍ରସ୍ତ ଗୋରୁ ମାଲିକଙ୍କୁ କ୍ଷତିପୂରଣ ଯୋଗାଇ ଦେବାକୁ ଗାଁ ଲୋକେ ଦାବି କରିଛନ୍ତି ।
ନବରଙ୍ଗପୁରରୁ ତପନ କୁମାର ବିଷୋୟୀ, ଇଟିଭି ଭାରତ
