ନବରଙ୍ଗପୁର: କୋଡ଼ିଙ୍ଗା ହାଜତ ମୃତ୍ୟୁ ମାମଲାକୁ ନେଇ ରାଜ୍ୟପାଳଙ୍କୁ ଦାବିପତ୍ର ପ୍ରଦାନ କଲେ ପୂର୍ବତନ ସାଂସଦ। ଜିଲ୍ଲାପାଳଙ୍କ ଜରିଆରେ ପ୍ରଦାନ କରାଯାଇଛି ଏହି ଦାବିପତ୍ର । ଘଟଣାର ମୁଖ୍ୟ ଦୋଷୀ ବିରୋଧରେ ରାଜ୍ୟସରକାର କୌଣସି ପଦକ୍ଷେପ ନେଉନଥିବା ଅଭିଯୋଗ କରିଛନ୍ତି ପୂର୍ବତନ ସାଂସଦ ବଳଭଦ୍ର ମାଝୀ।
ଦାବିପତ୍ର ଅନୁଯାୟୀ କୋଡ଼ିଙ୍ଗା ହାଜତ ମୃତ୍ୟୁ ମାମଲାରେ ରାଜ୍ୟ ସରକାର ମୃତକଙ୍କ ପରିବାରଙ୍କୁ ସାହାଯ୍ୟ କରିବା ପାଇଁ କୌଣସି ପଦକ୍ଷେପ ଗ୍ରହଣ କରୁନାହାଁନ୍ତି । ଏହାସହ ଦୋଷୀ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ ନକରି ଘଣ୍ଟ ଘୋଡାଉଥିବା ଅଭିଯୋଗ କରିଛନ୍ତି । ଉକ୍ତ ମାମଲାରେ ସେ ମୃତକ ପରିବାରକୁ ୨୦ ଲକ୍ଷ ଟଙ୍କା କ୍ଷତିପୂରଣ ଦେବାକୁ ଦାବି କରିଛନ୍ତି ।
ସେପଟେ ପରିବାରର ଜଣକୁ ସରକାରୀ ଚାକିରୀ ଯୋଗାଇ ଦେବେ ନଚେତ ମାସିକ ପାଞ୍ଚ ହଜାର ଟଙ୍କା ଦେବା ପାଇଁ ଦାବି କରିଛନ୍ତି । ଉକ୍ତ ମାମଲାରେ ସମ୍ପୃକ୍ତ ପୋଲିସ କର୍ମଚାରୀଙ୍କ ବିରୋଧରେ ୩୦୨ ଦଫାରେ ମାମଲା ଦାୟର କରିବା ପାଇଁ ଦାବି କରାଯାଛି । ଜିଲ୍ଲା ବିଜେପିର ପ୍ରତିନିଧି ମଣ୍ଡଳୀଙ୍କ ସହ ସାମିଲ ହୋଇ ପୂର୍ବତନ ସାଂସଦ ବଳଭଦ୍ର ମାଝୀ ଜିଲ୍ଲାପାଳଙ୍କୁ ଉକ୍ତ ଦାବିପତ୍ର ପ୍ରଦାନ କରିଥିଲେ ।
ନବରଙ୍ଗପୁରରୁ ତପନ ବିଷୋୟୀ, ଇଟିଭି ଭାରତ
