ନବରଙ୍ଗପୁର: ମହାମାରୀ ମହାସଙ୍କଟ କୋରୋନା ଯୋଗୁଁ ଦେଶରେ ଦିକକୁ ଦିନ ବୃଦ୍ଧି ପାଉଛି ମୃତକଙ୍କ ସଂଖ୍ୟା । ଅନ୍ୟପଟେ ଦୀର୍ଘଦିନ ଧରି ତାଲାବନ୍ଦ ଯୋଗୁଁ ସାରା ବିଶ୍ବରେ ଦେଖାଦେଇଛି ଆର୍ଥିକ ମାନ୍ଦାବସ୍ଥା । ଉଜୁଡି ଯାଇଛି ଜୀବନ ଓ ଜୀବିକା । ଆଉ ଏଭଳି ପରିସ୍ଥିତିରେ କୌଳିକ ବୃତ୍ତିକୁ ଆଗକୁ ବଢ଼ାଇ ବଞ୍ଚିବା ଶିଖୁଛନ୍ତି ଆଦିବାସୀ। ଗୋଟିଏ ପଟେ ସରକାରଙ୍କ କୋରୋନା ନିୟମ ମାନି ଚଳୁଛନ୍ତି, ଆଉ ଅନ୍ୟପଟେ ନିଜର ଜୀବିକା ଉପରେ ନିର୍ଭର କରି ପରିବାର ପ୍ରତିପୋଷଣ କରୁଛନ୍ତି । ସେଭଳି ଜଣେ ଆଦିବାସୀ ମହିଳା ହେଲେ ନବରଙ୍ଗପୁର ଜିଲ୍ଲାର ଧନମତି ଭତ୍ରା ।
ଆଦିବାସୀ ଅଧ୍ୟୁଷିତ ଅଖ୍ୟାତ ପଲ୍ଲୀର ଏହି ମହିଳା ଜଣକ ହେଲେ ଧନମତି ଭତ୍ରା । ପାପଡାହାଣ୍ଡି ଠାରୁ କୋଷାଗୁମୁଡା ଯିବା ମୁଖ୍ୟରାସ୍ତା କଡରେ ତାଙ୍କ ପରିବା ଦୋକାନ । ପନିପରିବା ବିକ୍ରି କରି ପିଲାମାନଙ୍କୁ ମଣିଷ କରିବାକୁ ସ୍ବପ୍ନ ନେଇ ଧନମତି ନିଜ ଜମିରେ ଫଳାଇଛନ୍ତି ପନିପରିବା । ଉଠା ଦୋକାନ ଚାରିପଟେ ତାର ବାଡ଼ ଦେବା ସହ ଗ୍ରାହକଙ୍କୁ ସାଧାସଳଖ ହାତରେ ନଦେଇ ବାଡି ସାହାଯ୍ୟରେ ଗ୍ରାହକଙ୍କୁ ବଢାଇ ଦେଉଛନ୍ତି ପରିବା।
ଯାହାକୁ ବେଶ ପ୍ରଶଂସା କରିଛନ୍ତି ନବରଙ୍ଗପୁର ଜଣେ ବାସିନ୍ଦା । ମହାମାରୀ କୋରୋନା ପାଇଁ ସଚେତନତା ବାର୍ତ୍ତା ଦେଇ ବିପୁଳ ଅର୍ଥ ବ୍ୟୟ କରୁଥିବା ବେଳେ ଏହି ଲଢେଇରେ ଧନମତିଙ୍କ ଯୋଗଦାନ ଅସାଧାରଣ । ତାଙ୍କ ପ୍ରୟାସକୁ ସମସ୍ତେ ପ୍ରଶଂସା କରିବା ସହ ଅନୁକରଣ ମଧ୍ୟ କରୁଛନ୍ତି । ସାଧାରଣ ପଲ୍ଲୀର ନିରକ୍ଷର ମହିଳାଙ୍କ ଅସାଧାରଣ ପ୍ରୟାସ ସ୍ଥାନୀୟ ଅଞ୍ଚଳ ପାଇଁ ଉଦାହରଣ ପାଲଟିଛି ।
ନବରଙ୍ଗପୁରରୁ ତପନ କୁମାର ବିଷୟି, ଇଟିଭି ଭାରତ
