ନବରଙ୍ଗପୁର: ସ୍ୱାଧୀନତାର ୭୨ ବର୍ଷ ବିତି ଯାଇଥିଲେ ମଧ୍ୟ ସରକାର ଗାଁକୁ ଭଲ ରାସ୍ତା ଟିଏ କରି ପାରିଲେନି । ସରକାରଙ୍କ ବିକାଶ ଗାଡି ବି ଗଡିନି ନବରଙ୍ଗପୁରର ଦୁଇଟି ଗ୍ରାମକୁ । କହିବାକୁ ଗଲେ ସରକାରଙ୍କ ମାଳମାଳ ଯୋଜନା ଏଠି ଫେଲ ୍ ମାରିଛି । ଆମେ କହୁଛୁ ନବରଙ୍ଗପୁର ଜିଲ୍ଲା, ପାପଡାହାଣ୍ଡି ବ୍ଲକ ମୈଦଲପୁର ଗ୍ରାମ ପଞ୍ଚାୟତର ଗୁଡୁରିଗୁଡା ଓ ସିରାଗୁଡ଼ା ଗ୍ରାମ ବିଷୟରେ ।
ଏହି ଗାଁକୁ ପକ୍କା ରାସ୍ତା ନଥିବାରୁ ଆଧୁନିକତାରୁ ବଞ୍ଚିତ ହେଇଛନ୍ତି ଗ୍ରାମବାସୀ । ଭତ୍ତା, ଚାଉଳ, କିରୋସିନୀ ଭଳି ଅତ୍ୟାବଶ୍ୟକ ସାମଗ୍ରୀ ପାଇଁ ୭ କିଲୋମିଟର ଦୁରରେ ଥିବା ମୈଦଲପୁର ପଞ୍ଚାୟତକୁ ନିର୍ଭର କରିଥାନ୍ତି । ପ୍ରଶାସନ ଓ ରାଜନେତାଙ୍କ ପାଖରେ ବାରମ୍ବାର ଗୁହାରୀ କରିଥିଲେ ମଧ୍ୟ ଆଜି ଯାଏଁ ଏହି ଗ୍ରାମକୁ ରାସ୍ତାଟିଏ ତିଆରି ହେଇ ପାରିଲାନାହିଁ, ତେଣୁ ଉକ୍ତ ଗ୍ରାମର ଲୋକମାନେ ମିଶି ନିଜେ ଶ୍ରମଦାନ କରି ରାସ୍ତା ନିର୍ମାଣ କରୁଛନ୍ତି ।
ସେପଟେ ଗ୍ରାମରେଆବାସ ଯୋଜନା କାର୍ଯ୍ୟକାରୀ ହୋଇପାରୁନାହିଁ । ବିଦ୍ୟାଳୟ ଓ ଅଙ୍ଗନବାଡ଼ି କେନ୍ଦ୍ର ଯିବାକୁ ହେଲେ ଜଙ୍ଗଲ ବାଟ ଦେଇ ଶିଶୁ ମାନଙ୍କୁ ୨ କିଲୋମିଟର ଚାଲିବାକୁ ପଡୁଛି । କେବଳ ସ୍ୱାସ୍ଥ୍ୟକର୍ମୀ ଓ ଆଶାକର୍ମୀଙ୍କୁ ଛାଡ଼ି ଦେଲେ ଆଉ କୌଣସି ସରକାରୀ ବାବୁଙ୍କ ପାଦ ପଡିନି ଏହି ଦୁଇ ଗ୍ରାମରେ । ତେଣୁ ଅତିଶୀଘ୍ର ସେମାନଙ୍କ ଦୁଃଖ ବୁଝି ସମସ୍ୟାର ସମାଧାନ ପାଇଁ ଦାବି କରିଛନ୍ତି ଗ୍ରାମବାସୀ ।
ନବରଙ୍ଗପୁରରୁ ତପନ ବିଷୋୟୀ, ଇଟିଭି ଭାରତ
