ଇନ୍ଦ୍ରାବତୀରେ ଓଲଟିଲା ମାଛଧରା ଡଙ୍ଗା, ଜଣେ ମୃତ

ଇନ୍ଦ୍ରାବତୀରେ ମାଛଧରା ଡଙ୍ଗା ପାଣିରେ ବୁଡି ଜଣେ ମୃତ । ଅଧିକ ପଢନ୍ତୁ...

ନବରଙ୍ଗପୁର: ଜିଲାର ନନ୍ଦାହାଣ୍ଡି ବ୍ଲକ ବଡ଼ଡାଇଭଟ୍ଟା ନିକଟସ୍ଥ ଇନ୍ଦ୍ରାବତୀ ନଦୀରେ ଏକ ମାଛଧରା ଡଙ୍ଗା ଓଲଟି ପଡି ଜଣେ ଯୁବକଙ୍କ ମୃତ୍ୟୁ ଘଟିଛି । ମୃତ ଯୁବକ ଜଣକ ନନ୍ଦାହାଣ୍ଡି ବ୍ଲକ କୋଈଗୁଡା ଗ୍ରାମର ନୀଳକଣ୍ଠ ଅମାନତ୍ୟ ବୋଲି ଜଣାପଡିଛି ।

ରବିବାର ନୀଳକଣ୍ଠଙ୍କ ସମେତ ୪ ଜଣ ବ୍ୟକ୍ତି ମାଛ ମାରିବାକୁ ଇନ୍ଦ୍ରାବତୀ ନଦୀକୁ ନିଜ ନିଜ ଡଙ୍ଗାରେ ଯାଇଥିଲେ । ହଠାତ‌ ନୀଳକଣ୍ଠଙ୍କ ଡଙ୍ଗା ଓଲଟି ପଡିବାରୁ ସେ ପାଣିରେ ବୁଡି ନିଖୋଜ ହୋଇଯାଇଥିଲେ । ଖବରପାଇ ନବରଙ୍ଗପୁର ଅଗ୍ନିଶମ ବାହିନୀ ସେଠାରେ ପହଞ୍ଚି ତାଙ୍କୁ ଖୋଜାଖୋଜି କରିଥିଲା ।

ଦୀର୍ଘ ୩ଘଣ୍ଟା ପରେ ନୀଳକଣ୍ଠଙ୍କ ମୃତଦେହ ମିଳିଥିଲା । ପୋଲିସ ମୃତଦେହ ବ୍ୟବଚ୍ଛେଦ ପାଇଁ ଜିଲା ମୁଖ୍ୟ ଚିକିତ୍ସାଳୟକୁ ପଠାଇଛି । ବ୍ୟବଚ୍ଛେଦ ପରେ ମୃତଦେହ ପରିବାର ଲୋକଙ୍କୁ ହସ୍ତାନ୍ତର କରାଯିବ ବୋଲି ନବରଙ୍ଗପୁର ପୋଲିସ ସୂଚନା ଦେଇଛି ।
ନବରଙ୍ଗପୁରରୁ ତପନ କୁମାର ବିଷୋୟୀ, ଇଟିଭି ଭାରତ