ନବରଙ୍ଗପୁର: ପୌର ନିର୍ବାଚନ ପ୍ରଚାର ଶେଷ ଦିନରେ କମ୍ପିଲା ନବରଙ୍ଗପୁର । ପ୍ରତିପକ୍ଷଙ୍କୁ ପରାସ୍ତ କରିବାକୁ ପ୍ରମୁଖ ରାଜନୈତିକ ଦଳ ରଣନୀତି ପ୍ରସ୍ତୁତି କରିଛନ୍ତି । ସେହିପରି ନିର୍ବାଚନକୁ ନେଇ ନବରଙ୍ଗପୁର ସହରାଞ୍ଚଳ ରାଜନୈତିକ ସରଗରମ ରହିଛି । ନବରଙ୍ଗପୁର ପୌର ପରିଷଦର ଗାଦବାଗୁଡା ୧୩ନଂ ଓ୍ବାର୍ଡ ଉପରେ ସମସ୍ତଙ୍କ ନଜର ରହିଛି । ଏହି ୱାର୍ଡରେ ବିଜେଡିର ରଞ୍ଜିତା ପଣ୍ଡା ଓ ବିଜେପିର ସଂଯୁକ୍ତା ସାହୁ ଏବଂ ସ୍ବାଧୀନ ଭାବେ ହେମଲତା ଆଚାର୍ଯ୍ୟ ନିର୍ବାଚନ ଲଢୁଛନ୍ତି । ହେଲେ ଚଳିତ ଥର କଂଗ୍ରେସ ଦଳ ପକ୍ଷରୁ ଏହି ଓ୍ବାର୍ଡରେ କୌଣସି ପ୍ରାର୍ଥୀ ଦିଆଯାଇ ନାହିିଁ ।
ସେହିଭଳି ଏହି ଓ୍ବାର୍ଡ ବିଜେଡି ଓ ବିଜେପି ପାଇଁ ସମ୍ମାନର ପ୍ରଶ୍ନ ହୋଇଥିବା ବେଳେ ସ୍ବାଧୀନ ପ୍ରାର୍ଥୀ ନିର୍ଣ୍ଣାୟକ ଭୂମିକାରେ ଅବତୀର୍ଣ୍ଣ ହେବା ସମ୍ଭାବନା ରହିଛି । ଏହା ସହିତ ପାନୀୟ ଜଳ, ଶୋଚନୀୟ କଂକ୍ରିଟ ରାସ୍ତା ଓ୍ବାର୍ଡବାସୀଙ୍କ ଦୀର୍ଘ ଦିନର ସମସ୍ୟା ପାଲଟିଛି । ଏପଟେ ରାସ୍ତାଘାଟ, ଡ୍ରେନେଜ୍, ପାନୀୟଜଳ ସମସ୍ୟାକୁ ନେଇ ଏହି ୱାର୍ଡରେ ତୀବ୍ର ଅସନ୍ତୋଷ ଲାଗି ରହିଥିବା ବେଳେ ସମସ୍ୟା ସମାଧାନ କରିବାକୁ ପ୍ରତିଶୃତି ଦେଇ ପ୍ରାର୍ଥୀମାନେ ଭୋଟରଙ୍କ ନିକଟତର ହେବାକୁ ଉଦ୍ୟମ କରୁଛନ୍ତି ।
ନବରଙ୍ଗପୁରରୁ ତପନ କୁମାର ବିଷୋୟୀ, ଇଟିଭି ଭାରତ
