ନବରଙ୍ଗପୁର: ନଗରପାଳଙ୍କୁ ଦୁର୍ବ୍ୟବହାର ତାତି ଜୋର ଧରିଛି । ଏହାର ପ୍ରତିବାଦରେ ଆଜି (ମଙ୍ଗଳବାର) ସହର ସହ ପୌରପାଳିକା ୧୨ ଘଣ୍ଟିଆ ବନ୍ଦ ଡାକରା ଦେଲା ଜିଲ୍ଲା ବିଜେପି ( bjp calls nabarangpur bandh)। ଗତକାଲି (ସୋମବାର) ଜିଲ୍ଲାପରିଷଦ ଅଫିସରେ ତାଲା ପକାଇ କାର୍ଯ୍ୟାଳୟ ଆଗରେ ଧାରଣାରେ ବସିଥିଲେ ବିଜେପି ନେତା ଓ କର୍ମୀ । ହେଲେ କୌଣସି ପଦକ୍ଷେପ ଗ୍ରହଣ ନ କରାଯିବାରୁ ଆଜି ଏହି 12 ଘଣ୍ଟିଆ ବନ୍ଦ ଡାକରା ଦେଇଛି ଜିଲ୍ଲା ବିଜେପି ।
ନଗରପାଳଙ୍କୁ ଜିଲ୍ଲାପରିଷଦ ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ ଅନ୍ୟା ଦାଶଙ୍କ ଦୁର୍ବ୍ୟବହାର ପ୍ରତିବାଦରେ ଏହି ବନ୍ଦ ଡାକରା ଦେଇଛି ଜିଲ୍ଲା ବିଜେପି । ଜିଲ୍ଲା ପରିଷଦ କାର୍ଯ୍ୟନିର୍ବାହୀ ଅଧିକାରୀଙ୍କ ଦୁର୍ବବ୍ୟବହାର ପ୍ରତିବାଦରେ ମଙ୍ଗଳବାର ଜିଲ୍ଲା ବିଜେପି ପକ୍ଷରୁ ଉମରକୋଟ ବିଧାୟକ ନିତ୍ୟାନନ୍ଦ ଗଣ୍ଡଙ୍କ ନେତୃତ୍ବରେ ଜିଲ୍ଲା ପରିଷଦ କାର୍ଯ୍ୟାଳୟ ଫାଟକ ସମ୍ମୁଖରେ ଧାରଣା ଦିଆଯାଇଥିଲା । କିନ୍ତୁ ଏହାକୁ ନେଇ କୌଣସି ସରକାରୀ କର୍ମଚାରୀ ଧାରଣା ସ୍ଥଳକୁ ନ ଆସିବାରୁ ଶେଷରେ ବିଜେପି କର୍ମକର୍ତାମାନେ ଟାୟାର ଜାଳି ଜାତୀୟ ରାଜପଥ ଅବରୋଧ କରିଥିଲେ । ଶେଷରେ ପୋଲିସ ସେମାନଙ୍କୁ ଉଠାଇ ନେଇଥିଲା ।
ଥାନାରୁ ବାହାରିବା ପରେ ବିଜେପି ନେତୃ ମଣ୍ଡଳୀଙ୍କ ନିଷ୍ପତ୍ତି କ୍ରମେ ଆଜି ୧୨ ଘଣ୍ଟିଆ ନବରଙ୍ଗପୁର ସହର ତଥା ପୌରପାଳିକା ଅଞ୍ଚଳକୁ ବନ୍ଦ ଡାକରା ଦେଇଛି ଜିଲ୍ଲା ବିଜେପି । ସକାଳ 6ରୁ ସନ୍ଧ୍ୟା 6 ଯାଏ ବନ୍ଦ ପାଳନ ହେବ । ଏହି ବନ୍ଦ ସମୟରେ ଜରୁରୀ ସେବା ବ୍ୟତୀତ ଅନ୍ୟ ସମସ୍ତ ସେବା ବନ୍ଦ ରହିଛି । ସ୍ବାଭିମାନ ମାଟିରେ ଜନପ୍ରତିନିଧିଙ୍କୁ ଦୁର୍ବ୍ୟବହାର ଗ୍ରହଣୀୟ ନୁହେଁ ବୋଲି ବିଜେପି କହିଛି । ଜିଲ୍ଲାପରିଷଦ ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ ଅନ୍ୟା ଦାସ କ୍ଷମା ମାଗନ୍ତୁ ବୋଲି ଦାବି କରିଛି ଜିଲ୍ଲା ବିଜେପି ।
ଏହା ବି ପଢନ୍ତୁ...ରୋଜଗାର ଦେଲା ପଲ୍ଲୀ ନର୍ସରୀ, ବଦଳିଲା ମହିଳାଙ୍କ ଜୀବନ ଶୈଳୀ
ସୂଚନାଅନୁସାରେ ରବିବାର ହକି ବିଶ୍ବକପ ଟ୍ରଫିର ସ୍ବାଗତ ଉତ୍ସବରେ ନଗରପାଳ କୁନୁ ନାୟକଙ୍କୁ ଜିଲ୍ଲା ପରିଷଦ ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ ଅନ୍ୟା ଦାସ ଦୁର୍ବବ୍ୟହାର କରିଥିଲେ । ନଗରପାଳଙ୍କୁ କିଏ ବୋଲି ପ୍ରଶ୍ନ କରିବା ସହ ଚୌକିରେ ବସିବାକୁ ଦେଇନଥିଲେ । ଏହି ଘଟଣାକୁ ଜିଲ୍ଲା ବିଜେପି ଓ କର୍ମକର୍ତ୍ତାମାନେ ନିନ୍ଦା କରିଥିଲେ ।
ଇଟିଭି ଭାରତ, ନବରଙ୍ଗପୁର
