ନବରଙ୍ଗପୁର: ବର୍ଷା ଦିନ ଆରମ୍ଭ ହୋଇଯାଇଥିବାବେଳେ ଝରିଗାଁ ବ୍ଲକ ବାଗବେଡା ଗାଁରେ ଭଲ ରାସ୍ତା ଖଣ୍ଡେ ନଥିବାରୁ ଯାତାୟତ ପାଇଁ ଲୋକେ ନାହିଁନଥିବା ଅସୁବିଧା ଭୋଗୁଛନ୍ତି । ଫଳରେ ଗ୍ରାମକୁ ପକ୍କା ରାସ୍ତା କରିବାକୁ ବାରମ୍ବାର ଦାବି କରାଯିବା ସତ୍ତ୍ବେ ଫଳ ଶୂନ । ଶେଷରେ ବାଧ୍ୟ ହୋଇ ନିଆରା ଢଙ୍ଗରେ ପ୍ରତିବାଦ କରିଛନ୍ତି ବାଗବେଡା ଗାଁ ଲୋକେ ।
ସ୍ବାଧୀନତାର 72 ବର୍ଷ ପରେ ମଧ୍ୟ ଗ୍ରାମରେ ଭଲ ରାସ୍ତାଟିଏ ଦେଖିନାହାଁନ୍ତି ଏହି ଗାଁ ଲୋକେ । ବର୍ଷର ଅନ୍ୟ ଦିନେ ଯାହା ଯେମିତି ଚଳି ଯାଉଥିବାବେଳେ ବର୍ଷା ଦିନରେ ଏହି ରାସ୍ତାରେ ଚଳିବା ବହୁ କଷ୍ଟ ବୋଲି ଗ୍ରାମବାସୀ କହିଛନ୍ତି ।
ବର୍ଷାରେ ରାସ୍ତାରେ କାଦୁଅ ପଚପଚ ହେବା ସହ ଖାଲ ଗୁଡିକରେ ପାଣି ଜମି ରହୁଛି । ତେଣୁ ବାଗବେଡାରୁ ତହରାକରିଆଗୁଡ଼ାକୁ ଯାଇଥିବା ଏହି ରାସ୍ତା ସମ୍ପୂର୍ଣ୍ଣ ଶୋଚନୀୟ ହୋଇଥିବାବେଳେ ରାଜନେତା କି ପ୍ରଶାସନ ଏଥିପ୍ରତି ଦୃଷ୍ଟି ଦେଉନାହାଁନ୍ତି ।
ଏବେ ବର୍ଷା ଲାଗି ରହିଥିବାରୁ ସମସ୍ୟା ଦୁଇ ଗୁଣିତ ହୋଇଯାଇଛି । ସ୍କୁଲ ଓ ଅଙ୍ଗନବାଡିକୁ ପିଲାମାନେ ଯାଇ ପାରୁନାହାଁନ୍ତି କିମ୍ବା ଗ୍ରାମରେ କୌଣସି ରୋଗୀ ଅବା ଗର୍ଭବତୀଙ୍କୁ ହସ୍ପିଟାଲ ନେବାକୁ ଆମ୍ବୁଲାନ୍ସ ଆସିପାରୁନାହିଁ ।
ବହୁବାର ଗ୍ରାମବାସୀ ଏନେଇ ଅଭିଯୋଗ କରିବା ସତ୍ତ୍ବେ କୌଣସି ଫଳ ନମିଳିବାରୁ ଶେଷରେ ବାଧ୍ୟ ହୋଇ ନିଆରା ଢଙ୍ଗରେ କାଦୁଅ ପଚପଚ ରାସ୍ତାରେ ଧାନ ରୋଇ ପ୍ରତିବାଦ କରିଛନ୍ତି ବାଗବେଡା ଗାଁ ଲୋକେ । ତେବେ ଆଗାମୀ ଦିନରେ ଯଦି ଏହି ସମସ୍ୟାର ସମାଧାନ ନହୁଏ ତେବେ ଗ୍ରାମବାସୀ ରାଜରାସ୍ତାକୁ ଓହ୍ଲାଇବେ ବୋଲି ଚେତାବନୀ ଦେଇଛନ୍ତି ।
ନବରଙ୍ଗପୁରରୁ ତପନ ବିଷୋୟୀ, ଇଟିଭି ଭାରତ
