ନବରଙ୍ଗପୁର: ସରକାର ଶିକ୍ଷା ଓ ଶିଶୁଙ୍କ ବିକାଶ ନାଁ ରେ କୋଟି କୋଟି ଖର୍ଚ୍ଚ କରୁଛନ୍ତି । ହେଲେ ପ୍ରକୃତରେ ଏହା କେତେ କାମରେ ଆସୁଛି ଦେଖନ୍ତୁ ନବରଙ୍ଗପୁର ଜିଲ୍ଳା ଝରିଗାଁ ବ୍ଲକ ଛୁଇଁମାଟିଗୁଡା ଅଙ୍ଗନବାଡି କେନ୍ଦ୍ରର ପ୍ରକୃତ ଚିତ୍ର ।
ବାହାରୁ ଦେଖିଲେ ଚିକ୍କଣ । ଭିତରେ କାନ୍ତ ଫାଟି ଆଁ କଲାଣି । ଚଟାଣରୁ ସିମେଣ୍ଟ ବାହାରି ଗଲାଣି । କେତେବେଳେ କାନ୍ଥ ଭୁଷୁଡି ଯିବ କିଛି ଭରଷା ନାହିଁ । ଏଭଳି ଅସୁରକ୍ଷିତ ଅବସ୍ଥାରେ ଚାଲିଛି ଅଙ୍ଗନବାଡି କେନ୍ଦ୍ର । ଏହା ହେଉଛି ନବରଙ୍ଗପୁର ଜିଲା ଝରିଗାଁ ବ୍ଲକ ଚଚା ପଞ୍ଚାୟତର ଛୁଇଁମାଟି ଗୁଡା ଗ୍ରାମର ଅଙ୍ଗନବାଡି କେନ୍ଦ୍ରର ଦୃଶ୍ୟ ।
ଏହି କେନ୍ଦ୍ରରେ ୩୦ ରୁ ଅଧିକ ପଢୁଥିବାବେଳେ ଗର୍ଭବତୀ ଓ ପ୍ରସୂତି ମାନେ ଆସିଥାନ୍ତି ଏହି କେନ୍ଦ୍ରକୁ । ହେଲେ ଗୃହର ଏମିତି ଅବସ୍ଥା ଦେଖି ସମସ୍ତଙ୍କ ମନରେ ଏବେ କୋକୁଆ ଭୟ । ଅନ୍ୟପଟେ ଅଙ୍ଗନବାଡି କର୍ମୀ ସବୁବେଳେ ଆସୁନଥିବାରୁ ପିଲାଙ୍କୁ ପାଖରେ ଥିବା କମିଟି ଗୃହ ବାରଣ୍ଡାରେ ପାଠ ପଢାଉଛନ୍ତି ପାଚିକା ।
ଠିକାଦାର ନିମ୍ନମାନର କାମ କରିଥିବାରୁ ଗୃହ ନିର୍ମାଣ ହେବାର ତିନିବର୍ଷ ନପୂରୁଣୁ କାନ୍ଥ ଭୁଷୁଡ଼ିବା ଅବସ୍ଥାକୁ ଆସିଲାଣି । ସେହିପରି ଝରିଗାଁ ବ୍ଲକରେ ରହିଛି ୨୯୩ ଅଙ୍ଗନବାଡି କେନ୍ଦ୍ର । ସେଥିମଧ୍ୟରୁ ୫୦ ଗୋଟି କେନ୍ଦ୍ରର ଗୃହ ନଥିବାରୁ ଭଡାଘରେ, ସ୍କୁଲ ବାରଣ୍ଡାରେ ଓ କେତୋଟି ଅଙ୍ଗନବାଡି କର୍ମୀଙ୍କ ଘରେ ଚାଲିଛି କେନ୍ଦ୍ର ।
ସେଥିମଧ୍ୟରୁ ୨୬ ଅଙ୍ଗନବାଡି କେନ୍ଦ୍ର ଗୃହର କାର୍ଯ୍ୟ ନିର୍ମାଣ କରିବାରେ ବିଳମ୍ବ ହେଉଥିବା ବେଳେ ୨୪ ଗୋଟି ଅଙ୍ଗନବାଡି କେନ୍ଦ୍ରର ଗୃହ ବିଲକୁଲ ନାହିଁ । ଏନେଇ ଝରିଗାଁ ଗୋଷ୍ଠୀ ଉନ୍ନୟନ ଅଧିକାରୀ ଦେବେନ୍ଦ୍ର ବାହାଦୂର ସିଂ ଧୁରିଆଙ୍କୁ ଯୋଗାଯୋଗ କରିବାରୁ ଅସମ୍ପୂର୍ଣ୍ଣ ଥିବା କେନ୍ଦ୍ର ଗୁଡ଼ିକର ଯଥାଶୀଘ୍ର କାର୍ଯ୍ୟ ସମ୍ପୂର୍ଣ୍ଣ କରାଯିବା ସହ ନୂତନ କେନ୍ଦ୍ର ମଧ୍ୟ କରାଯିବ ବୋଲି ପ୍ରତିଶ୍ରୁତି ଦେଇଛନ୍ତି ।
ନବରଙ୍ଗପୁରରୁ ତପନ କୁମାର ବିଷୋୟୀ, ଇଟିଭି ଭାରତ
