ନବରଙ୍ଗପୁର: ପୁଣି ବୁହା ହେଲେ ଗର୍ଭବତୀ । ଆମ୍ବୁଲାନ୍ସ ଆସିଲା କିନ୍ତୁ କାଦୁଅ ରାସ୍ତା ଯୋଗୁଁ ଗାଁକୁ ପହଞ୍ଚି ପାରିଲା ନାହିଁ। ଏପରି ଘଟଣା ଦେଖିବାକୁ ମିଳିଛି ନବରଙ୍ଗପୁର ଜିଲ୍ଲା ଝରିଗାଁ ବ୍ଲକ ତାରାଯୋଡି ଗ୍ରାମରେ । ଏହି ଗ୍ରାମର ମୋହନ ହରିଜନଙ୍କ ସ୍ତ୍ରୀ ସୁନାମଣି ହରିଜନଙ୍କୁ ଗର୍ଭଯନ୍ତ୍ରଣା ହେବାରୁ ପରିବାର ଲୋକେ 108 ଆମ୍ବୁଲାନ୍ସକୁ ଫୋନ କରିଥିଲେ କିନ୍ତୁ ଆମ୍ବୁଲାନ୍ସ ଆସି ଗାଁରୁ ଦୀର୍ଘ ତିନି କିଲୋମିଟର ଦୂରରେ ଅଟକି ଯାଇଥିଲା । କାରଣ କାଦୁଅରେ ଗାଁକୁ ଯାଇଥିବା ରାସ୍ତାଟି ସମ୍ପୁର୍ଣ୍ଣ ଖରାପ ହୋଇଯାଇଥିଲା ଯାହା ଫଳରେ ଆମ୍ବୁଲାନ୍ସ କାଦୁଅ ଭିତରେ ଅନେକ ସମୟ ଧରି ଫସି ରହିଥିଲେ ।
ସେପଟେ ଗାଁକୁ ଆମ୍ବୁଲାନ୍ସ ଆସିନପାରିବା ଶୁଣି ଗ୍ରାମବାସୀ ଓ ପରିବାର ଲୋକେ ଅଟୋ ଯୋଗେ ଦୁଇ କିଲୋମିଟର ଆସିଲେ କିନ୍ତୁ ରାସ୍ତା ଏତେ ଖରାପ ଥିଲା ଅଟୋ ମଧ୍ୟ ଯାଇ ପାରିଲା ନାହିଁ । ଶେଷରେ ବାଧ୍ୟ ହୋଇ ପରିବାର ଲୋକେ ଗର୍ଭବତୀଙ୍କୁ ବୋହି ବୋହି ପ୍ରାୟ ଏକ କିଲୋମିଟର ଶିର୍ଷିଆ ଗୁଡା ଛକ ନିକଟରେ ଅଟକି ଯାଇଥିବା ଆମ୍ବୁଲାନ୍ସ ନିକଟରେ ପହଞ୍ଚି ଥିଲେ । ଏହା ପରେ କାଦୁଅରେ ଫସିଥିବା ଆମ୍ବୁଲାନ୍ସକୁ କାଦୁଅରୁ ବାହାର କରି ଗର୍ଭବତୀଙ୍କୁ ଝରିଗାଁ ସ୍ବାସ୍ଥ୍ୟ କେନ୍ଦ୍ରକୁ ଆଣିଥିଲେ ।
ଗ୍ରାମବାସୀଙ୍କ କହିବା ଅନୁସାରେ ପ୍ରତିବର୍ଷ ଗାଁ ରାସ୍ତା ପାଇଁ ଅଭିଯୋଗ କଲେ ମଧ୍ୟ କେବଳ ମୋରମ ନାରେ ମାଟି ପକାଇ ଦେଇ ରାସ୍ତା କାମ ସାରି ଦିଅନ୍ତି । ବର୍ଷା ଦିନ ଆସିଲେ ରାସ୍ତା ପୁଣି କାଦୁଅ ହୋଇଯାଏ । ଏହି କାଦୁଅ ରାସ୍ତାରେ ଗର୍ଭବତୀ କିମ୍ବା ଯେକୌଣସି ରୋଗୀଙ୍କୁ ଖଟିଆ କିମ୍ବା କାନ୍ଧରେ ବୋହି ଆଣୁଥିବା ଅଭିଯୋଗ କରିଛନ୍ତି ଗ୍ରାମବାସୀ।
ନବରଙ୍ଗପୁରରୁ ତପନ ବିଷୋୟୀ, ଇଟିଭି ଭାରତ
