ନବରଙ୍ଗପୁର: କଙ୍ଗାରୁକୋର୍ଟରେ ଅକଥନୀୟ ନିର୍ଯାତନା । ଭାଇରାଲ ହେଲା ଭିଡିଓ । ନିର୍ଯାତନାର ସୀମା ଟପିଗଲେ କିଛି ଯୁବକ । ପରେ ଘଟଣାରେ ସମ୍ପୃକ୍ତି ଅଭିଯୋଗରେ ବାନ୍ଧିଲା ପୋଲିସ । ଏଭଳି ଘଟଣା ଘଟିଛି ଜିଲ୍ଲାର ପାପଡାହାଣ୍ଡି ଥାନା ଅନ୍ତର୍ଗତ ସିନ୍ଧିଗୁଡ଼ା ଗ୍ରାମରେ ।
ମୋବାଇଲରୁ ମୋବାଇଲ ଘୁରି ବୁଲୁଥିବା ଭିଡିଓ ଅନୁଯାୟୀ, ଅନୈତିକ ସମ୍ପର୍କକୁ ନେଇ ଜଣେ ଯୁବକଙ୍କୁ ଗଛରେ ବାନ୍ଧି ତାଙ୍କ ଗୁପ୍ତାଙ୍ଗରେ ସିଗାରେଟର ଚେଙ୍କ ଦେଇଥିଲେ ସିନ୍ଧିଗୁଡ଼ା ଗ୍ରାମାର କିଛି ଯୁବକ । ଏପଟେ ପୀଡିତଙ୍କ ଅଭିଯୋଗ ପରେ ଆଜି(ଶୁକ୍ରବାର) ପାପଡାହାଣ୍ଡି ପୋଲିସ ଉକ୍ତ ଘଟଣାରେ ସମ୍ପୃକ୍ତ ୭ ଜଣକୁ ଗାଁରୁ ଉଠାଇ ଆଣିଥିଲା ।
ସୂଚନା ଅନୁଯାୟୀ, ନବରଙ୍ଗପୁର ଜିଲ୍ଲା ପାପଡାହାଣ୍ଡି ଥାନା ଅନ୍ତର୍ଗତ ସିନ୍ଧିଗୁଡ଼ା ଗ୍ରାମର ଜନୈକ ଯୁବକ ଚନ୍ଦ୍ରପୁର ଗ୍ରାମର ଜଣେ ଯୁବତୀଙ୍କୁ ବିବାହ କରିଥିଲେ । ତେବେ ରାଣୀଗୁଡା ଗ୍ରାମର ଅନ୍ୟ ଜଣେ ଯୁବକଙ୍କ ସହ ସିନ୍ଧିଗୁଡ଼ା ଗ୍ରାମର ଜନୈକ ଯୁବକ ସ୍ତ୍ରୀଙ୍କ ଅନୈତିକ ସମ୍ପର୍କ ଥିବା ସନ୍ଦେହ କରି ଉଭୟଙ୍କୁ ଗାଁ ଦାଣ୍ଡର ଏକ ଗଛରେ ବାନ୍ଧି ଦେଇଥିଲେ ।
ଏହାସହ ପ୍ରେମିକର ଗୁପ୍ତାଙ୍ଗରେ ସିଗାରେଟ ଚେଙ୍କ ଦେଇଥିଲେ କିଛି ଯୁବକ । ତଥାପି ସେମାନଙ୍କ ମନ ନବୁଝିବାରୁ ଏକ ଆଦିବାସୀ ଗୀତ ବଜାଇ ଗୀତର ତାଳେ ତାଳେ ଉଭୟଙ୍କୁ ଡ୍ୟାନ୍ସ କରାଇଥିଲେ । ଯାହାର ଭିଡିଓ ବର୍ତ୍ତମାନ ସୋସିଆଲ ମିଡିଆରେ ବେଶ୍ ଭାଇରାଲ ହେବାରେ ଲାଗିଛି ।
ଆଜି ପୀଡ଼ିତ ଜଣକ ମୈଦଲପୁର ଫାଣ୍ଡିରେ ଏତଲା ଦେବାପରେ ଏତଲା ଆଧାରରେ ସିନ୍ଧିଗୁଡ଼ା ଗ୍ରାମରେ ପହଞ୍ଚି ୭ ଜଣକୁ ଉଠାଇ ଆଣି ସେମାନଙ୍କୁ ଗିରଫ କରି କୌର୍ଟ ଚାଲାଣ କରିଛି ପୋଲିସ ।
ନବରଙ୍ଗପୁରରୁ ତପନ କୁମାର ବିଷୋୟୀ, ଇଟିଭି ଭାରତ
