ନବରଙ୍ଗପୁର: ସ୍ବାସ୍ଥ୍ୟ ବିଭାଗ ପରେ ଶ୍ରମ ବିଭାଗରେ ସକ୍ରିୟ ଥିବା ଦଲାଲକୁ ଗିରଫ କରିଛି ନବରଙ୍ଗପୁର ପୋଲିସ । ବିଭିନ୍ନ ବିଭାଗରେ ସକ୍ରିୟ ଥିବା ଦଲାଲ ଗିରଫ ଅଭିଯାନକୁ ଜୋରଦାର କରିଛି ଜିଲ୍ଲା ପୋଲିସ । ଗତ କିଛିଦିନ ପୂର୍ବେ ସ୍ବାସ୍ଥ୍ୟ ବିଭାଗରେ ଥିବା ୫ ଜଣ ଦଲାଲକୁ ଗିରଫ କରିଥିଲା । ଆଜି ଶ୍ରମ ବିଭାଗରେ ସକ୍ରିୟ ଥିବା ୧୧ ଜଣ ଦଲାଲକୁ ଗିରଫ କରିଛି ନବରଙ୍ଗପୁର ପୋଲିସ ।
ଏହି ଶ୍ରମିକ ଦଲାଲ ମାନେ ବିଭିନ୍ନ ସମୟରେ ବିଭିନ୍ନ ଅଞ୍ଚଳରୁ ଶ୍ରମିକ ମାନଙ୍କୁ ବେଆଇନ ଭାବେ ରାଜ୍ୟ ତଥା ରାଜ୍ୟ ବାହାରର ବିଭିନ୍ନ ସ୍ଥାନକୁ ଚାଲାଣ କରୁଛନ୍ତି । ଦଲାଲ ମାନେ ଶ୍ରମିକଙ୍କୁ ଟଙ୍କା ପ୍ରଲୋଭନ ଦେଖାଇ ଚାଲାଣ କରି ମାଲିକ ମାନଙ୍କ ଠାରୁ ଭଲ ଟଙ୍କା ପାଉଛନ୍ତି । କିନ୍ତୁ ଶ୍ରମିକ ମାନେ ରାଜ୍ୟ ବାହାର ମାଲିକ ମାନଙ୍କ ନିକଟକୁ କାମ କରିବାକୁ ଯାଇ କାମ କରି ପ୍ରତିବଦଳରେ ଟଙ୍କା ନ ପାଇ ବିଭିନ୍ନ ସମୟରେ ଶାରୀରିକ ଓ ମାନସିକ ନିର୍ଯ୍ୟାତନାର ଶିକାର ହେଉଛନ୍ତି ।
ଯାହାଫଳରେ ନବରଙ୍ଗପୁର ପୋଲିସ ଉକ୍ତ ଦଲାଲଙ୍କୁ ଧରପଗଡ଼ ଅଭିଯାନକୁ ଜୋରଦାର କରିଛି । ଜିଲ୍ଲାର ବିଭିନ୍ନ ଅଂଚଳରେ ସକ୍ରିୟ ଥିବା ୧୧ ଜଣ ଦଲାଲକୁ ଗିରଫ କରିବାରେ ସଫଳ ହୋଇଛି । ତେବେ ଆଗକୁ ମଧ୍ୟ ଏହି ଦଲାଲ ଗିରଫ ଅଭିଯାନକୁ ଜୋରଦାର କରାଯିବ ବୋଲି ନବରଙ୍ଗପୁର ପୋଲିସ ପ୍ରକାଶ କରିଛି ।
ନବରଙ୍ଗପୁରରୁ ତପନ କୁମାର ବିଷୋୟୀ, ଇଟିଭି ଭାରତ
