ରାଇରଙ୍ଗପୁର: ଯୁବକକୁ ଗଛରେ ବାନ୍ଧି ନିସ୍ତୁକ ପିଟିଲେ ଜନୈକ ଅବସରପ୍ରାପ୍ତ ସେନା କର୍ମଚାରୀ । ଏଭଳି ଘଟଣା ଦେଖିବାକୁ ମିଳିଛି ମୟୂରଭଞ୍ଜ ରରୁଆଁ ଥାନା ଅନ୍ତର୍ଗତ ଉସ୍କିପାଳ ଗାଁରେ । ତୋଫାନ ଚାତାର ନାମକ ଯୁବକକୁ ଉକ୍ତ ଗାଁର ଜନୈକ ଅବସରପ୍ରାପ୍ତ ସେନା କର୍ମଚାରୀ ସାମାନ୍ୟ ବଚସାକୁ ନେଇ ନିସ୍ତୁକ ପିଟିବା ସହିତ ଏକ ଗଛରେ ୩ ଘଣ୍ଟାରୁ ଅଧିକ ବାନ୍ଧି ରଖିଥିଲେ ।
ଏହି ଘଟଣା ପ୍ରଘଟ ହେବା ପରେ ଗାଁର ଲୋକେ ଯୁବକଙ୍କୁ ଉଦ୍ଧାର କରିଥିଲେ । ଏନେଇ ଯୁବକ ଜଣକ ଥାନାର ଦ୍ୱାରସ୍ତ ହୋଇଛନ୍ତି । ଘଟଣାର ସତ୍ୟାସତ୍ୟ ଜାଣିବା ପାଇଁ ଘଟଣାର ତଦନ୍ତ ଆରମ୍ଭ କରିଛି ପୋଲିସ ।
ତେବେ କିଛିଦିନ ପୂର୍ବରୁ କରଞ୍ଜିଆ ଅଞ୍ଚଳରେ ଏକ ପ୍ରେମୀ ଯୁଗଳଙ୍କୁ ଲଣ୍ଡାକରି ଗାଁରେ ବୁଲାଇବା ଘଟଣା ମନରୁ ନଲିଭୁଣୁ ପୁଣି ଏପରି ଏକ ଅମାନବୀୟ ଘଟଣା ଜଣେ ଅବସରପ୍ରାପ୍ତ ସେନା କର୍ମଚାରୀଙ୍କ ଦ୍ଵାରା ହୋଇଥିବା ବୁଦ୍ଧିଜୀବୀଙ୍କ ମହଲରେ ନିନ୍ଦାର ବିଷୟ ପାଲଟିଛି । ସେହିପରି ଅଭିଯୁକ୍ତଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ନେବା ପାଇଁ ମଧ୍ୟ ସାଧାରଣରେ ଦାବି ହୋଇଛି ।
ରାଇରଙ୍ଗପୁରରୁ ସଞ୍ଜୟ କୁମାର ପରିଡା, ଇଟିଭି ଭାରତ
