ରାଇରଙ୍ଗପୁର: ଘରେ କେହି ନଥିବା କହି ପ୍ରେମିକାକୁ ଘରକୁ ଡାକିଥିଲା ପ୍ରେମିକ । ଘରେ ପହଞ୍ଚିବା ପରେ ପ୍ରେମିକାକୁ ମରଣାନ୍ତକ ଆକ୍ରମଣ କଲେ ପ୍ରେମିକର ପରିବାର ଲୋକେ । ନିସ୍ତୁକ ମାଡ ମାରିବା ସହ ଜୀବନରୁ ମାରି ଦେବାକୁ କରୁଥିଲେ ଉଦ୍ୟମ । ଅଳ୍ପକେ ବର୍ତ୍ତି ଗଲେ ଯୁବତୀ ଜଣଙ୍କ । ଏଭଳି ଘଟଣା ଘଟିଛି ମୟୂରଭଞ୍ଜ ଜିଲ୍ଲା ଯଶିପୁର ଥାନା ଅନ୍ତର୍ଗତ ଗୋଡାପଳସା ଗ୍ରାମରେ । ଯୁବତୀ ଜଣଙ୍କ ଆହତ ହୋଇଥିବା ବେଳେ ହସ୍ପିଟାଲରେ ଚିକିତ୍ସା ଜାରି ରହିଛି । ଥାନାରେ ଅଭିଯୋଗ ପରେ ପ୍ରେମିକର ବାପାକୁ ଗିରଫ କରିଛି ପୋଲିସ।
ମିଳିଥିବା ସୂଚନା ଅନୁଯାୟୀ, ଯଶିପୁର ଥାନା ଅନ୍ତର୍ଗତ ଗୋଡାପଳସା ଗ୍ରାମର ଜନୈକ ପ୍ରେମିକ ଆଶିଷ ମହାନ୍ତଙ୍କ ସହିତ ଅନ୍ୟ ଏକ ଗ୍ରାମର ଯୁବତୀଙ୍କ ସହ ଦୀର୍ଘ ୫ ବର୍ଷ ହେବ ପ୍ରେମ ସମ୍ପର୍କ ରହି ଆସିଥିଲା । ସୋମବାର ଦିନ ସନ୍ଧ୍ୟା ସମୟରେ ପ୍ରେମିକ ଆଶିଷ ତାଙ୍କ ପ୍ରେମିକାଙ୍କୁ ନିଜ ଘରକୁ ଡ଼ାକିଥିଲା । ଏପଟେ ପ୍ରେମିକାର ଜୀବନ ନେବାକୁ ପ୍ରେମିକର ଘର ଲୋକେ ପୂର୍ବରୁ ପ୍ରସ୍ତୁତ ହୋଇଥିଲେ। ଯେତେବେଳେ ଯୁବତୀ ଜଣଙ୍କ ଘରେ ପହଞ୍ଚିଥିଲେ ସେତେବେଳେ ଆରମ୍ଭ ହୋଇଥିଲା ଆକ୍ରମଣ ।
ଆଶିଷଙ୍କ ମାଆ ଉକ୍ତ ଯୁବତୀଙ୍କ ଚୁଟିକୁ ଟାଣି ଧରିଥିବା ବେଳେ ବାପା ଟୁକୁ ମହାନ୍ତ ହତ୍ୟା ଉଦ୍ୟମ କରିଥିଲେ । ଏହି ସମୟରେ ଆଶିଷଙ୍କ ବଡଭାଇ ସିପୁନ ମହାନ୍ତ ଏକ ଠେଙ୍ଗା ସାହାଯ୍ୟରେ ଯୁବତୀଙ୍କୁ ପିଟି ଚାଲିଥିଲେ । ଏହି ସମୟରେ ଗ୍ରାମର କନ୍ଦର୍ପ ବାରିକ ତାଙ୍କ ଘରେ ପହଞ୍ଚି ଯିବାରୁ ଯୁବତୀଙ୍କୁ ଛାଡି ଦେଇଥିଲେ ପ୍ରେମିକଙ୍କ ଘର ଲୋକେ । ପରେ ଉକ୍ତ ଯୁବତୀଙ୍କୁ ଘରୁ ଘୋଷାଡି ଆଣି ବାହାରେ ଛିଡ଼ା ହୋଇଥିବା ଏକ ବୋଲେରୋରେ ଚାପି ମାରି ଦେବାକୁ ଉଦ୍ୟମ କରିଥିଲେ । ସ୍ଥାନୀୟ ଲୋକେ ଏହା ଦେଖି ଯୁବତୀଙ୍କୁ ଗୁରୁତର ଅବସ୍ଥାରେ ଉଦ୍ଧାର କରି ପ୍ରଥମେ ଯଶିପୁର ମେଡିକାଲରେ ଭର୍ତ୍ତି କରିଥିଲେ । ପରେ ଅଧିକ ଚିକିତ୍ସା ପାଇଁ କରଞ୍ଜିଆ ମେଡିକାଲକୁ ଯୁବତୀ ଜଣଙ୍କୁ ସ୍ଥାନାନ୍ତର କରାଯାଇଥିଲା।
ଘଟଣା ସମ୍ପର୍କରେ ଖବର ପାଇଁ ହସ୍ପିଟାଲରେ ପହଞ୍ଚି ଆକ୍ରମଣର ଶିକାର ହୋଇଥିବା ଯୁବତୀଙ୍କ ବୟାନ ରେକର୍ଡ କରିଥିଲା ଯଶିପୁର ଥାନା ପୋଲିସ । ତେବେ ଯୁବତୀଙ୍କୁ ପ୍ରେମିକ ସମେତ ତାର ପରିବାର ଲୋକେ ମରଣାନ୍ତକ ଆକ୍ରମଣ କରିଥିବା ସେ ପୋଲିସ ନିକଟରେ ଅଭିଯୋଗ କରିଥିଲେ । ଏନେଇ ଯଶିପୁର ଥାନାରେ 142/23ରେ ଏକ ହତ୍ୟା ଉଦ୍ୟମ ମାମଲା ରୁଜୁ କରିଛି ପୋଲିସ । ଏହି ଘଟଣାରେ ତଦନ୍ତ ପୋଲିସ ଜାରି ରଖିଥିବା ବେଳେ ଆଶିଷର ବାପା ଟୁକୁ ମହାନ୍ତଙ୍କୁ ପୋଲିସ ଗିରଫ କରିଥିବା ଜଣାପଡ଼ିଛି । ଯୁବତୀଙ୍କ ଚିକିତ୍ସା ଚାଲିଥିବା ବେଳେ ସ୍ବାସ୍ଥ୍ୟବସ୍ଥାରେ ଉନ୍ନତି ଆସିଥିବା ଡାକ୍ତର କହିଛନ୍ତି । ଅନ୍ୟପଟେ ପ୍ରେମିକ ଆଶିଷ, ତାଙ୍କ ବଡ଼ଭାଇ ଓ ମାଆ ଫେରାର ଥିବାରୁ ସେମାନଙ୍କୁ ଧରିବା ପାଇଁ ପୋଲିସ ଉଦ୍ୟମ ଜାରି ରଖିଛି ।
ଇଟିଭି ଭାରତ, ରାଇରଙ୍ଗପୁର
