ବାରିପଦା: ଜିଲ୍ଲାରେ ଜାରି ରହିଛି ଝାଡଖଣ୍ଡୀ ହାତୀଙ୍କ ଉତ୍ପାତ । ମୟୂରଭଞ୍ଜ ଜିଲ୍ଲା ବେତନଟୀ ରେଞ୍ଜ କୁସୁମପୁରା ଗାଁରେ ହାତୀ ଆକ୍ରମଣ ଯୋଗୁଁ ଜଣେ ମହିଳାଙ୍କ ମୃତ୍ୟୁ ହୋଇଥିବା ଜଣାପଡିଛି ।
ଗତ ମଙ୍ଗଳବାର ବିଳମ୍ବିତ ରାତିରେ କୁସୁମପୁରା ଗାଁରେ ଝାଡଖଣ୍ଡୀ ହାତୀ ପଶି ଜଣେ ମହିଳାଙ୍କ ଘର ଭାଙ୍ଗୁଥିବା ବେଳେ ମହିଳା ଜଣଙ୍କ ଘରୁ ବାହାରକୁ ଖସି ପଳାଇ ଆସିଥିଲେ । ମାତ୍ର ମହିଳା ଜଣଙ୍କ ଘରୁ ବାହାରକୁ ଦୌଡ଼ି ପଳାଉଥିବା ବେଳେ ହାତୀ ମହିଳା ଜଣଙ୍କୁ ଶୁଣ୍ଡରେ ଧରି କଚାଡି ଦେଇଥିଲା । ଯାହାଫଳରେ ଘଟଣାସ୍ଥଳରେ ତାଙ୍କର ମୃତ୍ୟୁ ହୋଇଛି । ମୃତ ମହିଳା ଜଣକ ହେଉଛନ୍ତି ବୈଶିଙ୍ଗା ଥାନା ଅନ୍ତର୍ଗତ କୁସୁମପୁରା ଗ୍ରାମର ରାମ ମାରାଣ୍ଡିଙ୍କ ପତ୍ନୀ ସୀତା ମାରାଣ୍ଡି ।
ଘଟଣାସ୍ଥଳରେ ବନବିଭାଗ ପହଞ୍ଚି ମହିଳାଙ୍କ ମୃତଦେହରୁ ଉଦ୍ଧାର କରି ବ୍ୟବଚ୍ଛେଦ ପାଇଁ ପିଆରଏମ୍ ମେଡିକାଲକୁ ପଠାଇଛି। ସେପଟେ ମୟୂରଭଞ୍ଜ ଜିଲ୍ଲାର ବିଭିନ୍ନ ସ୍ଥାନରେ ହାତୀ ଉପଦ୍ରବ ଦିନକୁ ଦିନ ବଢିବାରେ ଲାଗିଥିବା ବେଳେ ବନବିଭାଗ କର୍ମଚାରୀ ମାନେ ଏହାକୁ ପ୍ରତିରୋଧ କରିବାରେ ବିଫଳ ହେଉଥିବା ଦେଖାଯାଉଛି।
ମୟୂରଭଞ୍ଜରୁ ମୃତ୍ୟୁଞ୍ଜୟ ସେନାପତି, ଇଟିଭି ଭାରତ
