ବାରିପଦା:ମୟୂରଭଞ୍ଜ ଜିଲ୍ଲା ରାସଗୋବିନ୍ଦପୁର ଥାନା ଅନ୍ତର୍ଗତ ପୂର୍ଣ୍ଣଚନ୍ଦ୍ରପୁର-ଗଡିଘାଟି ରାସ୍ତା ପାଖ ଚାଷ ଜମିରୁ ମହିଳାଙ୍କ ମୃତଦେହ ଉଦ୍ଧାର(Woman Dead Body Found) । ମୃତଦେହ ଜବତ କରି ପୋଲିସର ତଦନ୍ତ ଜାରି ।
Woman Dead Body Found: ଚାଷ ଜମିରୁ ମୃତଦେହ ଉଦ୍ଧାର, ଦୁଷ୍କର୍ମ ପରେ ହତ୍ୟା ସନ୍ଦେହ
ସୂଚନା ଅନୁଯାୟୀ, ମେସିନ ସାହାଯ୍ୟରେ ଧାନ କାଟିବା ସମୟରେ ଉଲଗ୍ନ ଅବସ୍ଥାରେ ପଡିଥିବା ଏକ ମହିଳାଙ୍କ ଉପରେ ଚାଳକଙ୍କ ନଜର ପଡିଥିଲା । ଏନେଇ ସେ ସ୍ଥାନୀୟ ଲୋକଙ୍କୁ ଜଣାଇବାପରେ ସ୍ଥାନୀୟ ଲୋକେ ରାସଗୋବିନ୍ଦପୁର ପୋଲିସକୁ ଖବର ଦେଇଥିଲେ । ଖବର ପାଇ ରାସଗୋବିନ୍ଦପୁର ପୋଲିସ ପହଞ୍ଚି ମୃତଦେହ ଜବତ କରି ବ୍ୟବଚ୍ଛେଦ ପାଇଁ ପଠାଇଛି । ଏଥିସହ ମାମଲାର ଅଧିକ ତଦନ୍ତ ମଧ୍ୟ ଆରମ୍ଭ କରିଛି ।
ଅନ୍ୟପଟେ ମହିଳାଙ୍କୁ ଦୁଇ ତିନି ଦିନ ତଳେ କେହି ଦୁଷ୍କର୍ମ ପରେ ହତ୍ୟାକରି ଫିଙ୍ଗି ଦେଇଥିବା ସନ୍ଦେହ କରାଯାଉଛି । ମୃତ ମହିଳା ଜଣକ ମଙ୍ଗଳପୁର ଗ୍ରାମର ସିଙ୍ଗରାୟ ହେମ୍ବ୍ରମଙ୍କ ସ୍ତ୍ରୀ ଶିବାନୀ ହେମ୍ବ୍ରମ ବୋଲି ଜଣାପଡିଛି ।
ମୟୂରଭଞ୍ଜରୁ ମୃତ୍ୟୁଞ୍ଜୟ ସେନାପତି, ଇଟିଭି ଭାରତ
