ରାଇରଙ୍ଗପୁର: ଶ୍ରମଦାନ କରି ଡ୍ରେନ୍ ମରାମତି କଲେ ଗ୍ରାମବାସୀ। ଏପରି କିଛି ଘଟଣା ଦେଖିବାକୁ ମିଳିଛି ମୟୂରଭଞ୍ଜ ଜିଲ୍ଲା ବହଳଦା ବ୍ଲକ ଅନ୍ତର୍ଗତ ତାରଣା ଗ୍ରାମର ତଳସାହିରେ । ଉକ୍ତ ଗାଁ ରେ ଥିବା ଡ୍ରେନଟି ମରାମତି ଅଭାବରୁ ମାଟି ପଥରରେ ପୋତି ହୋଇ ଯାଇଥିଲା । ଫଳରେ ନାଳର ଅପରିଷ୍କାର ପାଣି ନିଷ୍କାଷିତ ହୋଇ ନପାରି ରାସ୍ତାରେ ବହି ଯାଉଥିଲା । ସ୍ଥାନୀୟ ବାସିନ୍ଦା ନାନା ସମସ୍ୟାର ସମ୍ମୁଖୀନ ହେଉଥିଲେ । ଅପରିଷ୍କାର ପାଣି ପାଇଁ ନାନା ପ୍ରକାରର ରୋଗ ବ୍ୟାଧି ମଧ୍ୟ ବ୍ୟାପୁଥିବାର ଅଭିଯୋଗ ହୋଇ ଆସୁଥିଲା । ଏସବୁ ସମସ୍ୟାକୁ ନେଇ ଗିଦିଘାଟୀ ସରପଞ୍ଚ ସୁନାମଣୀ ହେମ୍ବ୍ରମଙ୍କୁ ଲିଖିତ ଅଭିଯୋଗ କରାଯିବା ପରେ ମଧ୍ୟ ପଞ୍ଚାୟତ ପକ୍ଷରୁ କୌଣସି ପଦକ୍ଷେପ ନିଆଯାଇଥିବା ଅଭିଯୋଗ କରିଥିଲେ ଗ୍ରାମବାସୀ ।
ନିକଟରେ ମାଘବଙ୍ଗା' ଓ ବାହାବଙ୍ଗା' ରେ ଆଦିବାସୀଙ୍କ ପୂଜାସ୍ଥଳକୁ ପୂଜା ସାମଗ୍ରୀ ଧରି ନର୍ଦ୍ଦମା ପାଣି ଦେଇ ଯିବାକୁ ପଡୁଥିବା ପରିସ୍ଥିତିକୁ ଦୃଷ୍ଟିରେ ରଖି ଗ୍ରାମବାସୀ ନିଜ ପ୍ରଚେଷ୍ଟାରେ ଡ୍ରେନ ସଫେଇ ସହ ମରାମତି କରିବାକୁ ନିଷ୍ପତ୍ତି ନେଇଥିଲେ । ମରାମତି କାର୍ଯ୍ୟରେ ପେସା ଗ୍ରାମସଭା ସଦସ୍ୟ ତଥା ଗ୍ରାମର ପୁରୁଷ,ମହିଳାମାନେ ସାମୁହିକ ଶ୍ରମଦାନ କରି ମରାମତି କାର୍ଯ୍ୟ ଶେଷ କରିଥିଲେ । ଗ୍ରାମର ମାଝୀବାବା ରାମଚନ୍ଦ୍ର ହେମ୍ବ୍ରମଙ୍କ ନେତୃତ୍ବରେ ୭୫ ମିଟର ଲମ୍ବ ଡ୍ରେନ୍ର ମରାମତି କାର୍ଯ୍ୟ ସମ୍ପନ୍ନ କରିଛନ୍ତି ଗ୍ରାମବାସୀ। ତେବେ ଗ୍ରାମବାସୀଙ୍କ ଏପରି କାର୍ଯ୍ୟକୁ ସାଧାରଣରେ ପ୍ରଶଂସା କରାଯାଉଥିବା ଦେଖିବାକୁ ମିଳିଛି।
ରାଇରଙ୍ଗପୁର ସଞ୍ଜୟ କୁମାର ପରିଡା ,ଇଟିଭି ଭାରତ
