ରାଇରଙ୍ଗପୁର: ୧୯୬୩ ମସିହାରେ ପ୍ରତିଷ୍ଠିତ ମୟୁରଭଞ୍ଜ ଜିଲ୍ଲାର ଦ୍ବିତୀୟ ପୁରାତନ ଶିକ୍ଷାନୁଷ୍ଠାନ ରାଇରଙ୍ଗପୁର କଲେଜରେ +୩ ଛାତ୍ରଛାତ୍ରୀଙ୍କୁ କମ ନମ୍ବର ତଥା ଫେଲ୍ ମାର୍କ ମିଳିବା ନେଇ ଅଭିଯୋଗ ହୋଇଛି । ଛାତ୍ରଛାତ୍ରୀଙ୍କ ସହ ଅଭିଭାବକ ମଧ୍ୟରେ ଏନେଇ ଗଭୀର ଅସନ୍ତୋଷ ପ୍ରକାଶ ପାଇଛି।
ଅତି ଖାମଖିଆଲି ଓ ଉଦ୍ଦେଶ୍ୟମୂଳକ ଭାବେ ସଂପୃକ୍ତ ବିଭାଗ ପକ୍ଷରୁ କମ ନମ୍ୱର ଦିଆଯାଇଥିବା ଅଭିଯୋଗ କରିଛନ୍ତି ଛାତ୍ରଛାତ୍ରୀ ଓ ଅଭିଭାବକ । କିଛି ମାସ ପୂର୍ବରୁ ବିଭାଗୀୟ ମୁଖ୍ୟଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ତଥା ଛାତ୍ରଛାତ୍ରୀ ମାନଙ୍କୁ ନ୍ୟାୟ ପ୍ରଦାନ ଦାବିରେ ଉତ୍ତର ଓଡ଼ିଶା ବିଶ୍ଵବିଦ୍ୟାଳୟ ପରୀକ୍ଷା ନିୟନ୍ତ୍ରକଙ୍କୁ ଭେଟି ଏକ ଦାବିପତ୍ର ପ୍ରଦାନ କରିଥିଲେ । କିଛି ମାସ ପୂର୍ବରୁ ଛାତ୍ରଛାତ୍ରୀ ମାନେ ସେମାନଙ୍କ ପରୀକ୍ଷା ଖାତାର ସଠିକ୍ ଯାଞ୍ଚ ଓ ପୁନଃ ମୂଲ୍ୟାୟନ ପାଇଁ ଆବେଦନ କରିଥିଲେ ମଧ୍ୟ ଏନଓୟୁ ପକ୍ଷରୁ ଏନେଇ କୌଣସି ପଦକ୍ଷେପ ନିଆଯାଇନଥିବା ଛାତ୍ରଛାତ୍ରୀ ମାନେ ଅଭିଯୋଗ କରିଛନ୍ତି ।
ସେପଟେ ଗୁରୁବାର ଏନଓୟୁ (ନର୍ଥ ଓଡ଼ିଶା ୟୁନିଭରସିଟି) ପରୀକ୍ଷା ନିୟନ୍ତ୍ରକ ନିର୍ମଳ ପଣ୍ଡା ରାଇରଙ୍ଗପୁର କଲେଜ ପହଞ୍ଚିଥିଲେ । କମ ନମ୍ବର ପାଇଥିବା ଛାତ୍ରଛାତ୍ରୀ, ରାଇରଙ୍ଗପୁର କଲେଜ ଆଲୁମିନି ଆସୋସିଏସନର ସାଧାରଣ ସମ୍ପାଦକ ପାର୍ଥ ସାରଥି କବି, ଅଧ୍ୟକ୍ଷ ଦାୟିତ୍ଵରେ ଥିବା ଅଧ୍ୟାପକ ଜଗବନ୍ଧୁ ମହାନ୍ତ ଓ ଅଭିଭାବକଙ୍କ ସହିତ ଆଲୋଚନା କରି ୭ ଦିନ ମଧ୍ୟରେ ସଂଶୋଧିତ ପରୀକ୍ଷା ଫଳ ପ୍ରକାଶ କରିବାକୁ ପ୍ରତିଶ୍ରୁତି ଦେଇଛନ୍ତି ।
ରାଇରଙ୍ଗପୁରରୁ ସଞ୍ଜୟ ପରିଡା, ଇଟିଭି ଭାରତ
