ରାଇରଙ୍ଗପୁର: ବହୁଚର୍ଚ୍ଚିତ ରାଇରଙ୍ଗପୁର ଅଧ୍ୟାପିକା ମୃତ୍ୟୁ ଘଟଣାର ସମୀକ୍ଷା କରିବା ପାଇଁ ରାଜ୍ୟ ମହିଳା କମିଶନର ମିନତି ବେହେରା ନେତୃତ୍ବରେ ଏକ ତିନି ଜଣିଆ ଟିମ ମୟୂରଭଞ୍ଜ ଗସ୍ତ କରିଛି । ଏହି ଟିମରେ ଅତିରିକ୍ତ ପୋଲିସ ଏସପି ବିଜୟା ବାରୱା ଓ ନିର୍ବାହୀ ଅଧିକାରୀ ଅରବିନ୍ଦ ପଟ୍ଟନାୟକ ସାମିଲ ଅଛନ୍ତି । ମୟୂରଭଞ୍ଜ ଗସ୍ତ ବେଳେ ଏହି ଟିମ ସହ ଉପସ୍ଥିତ ଥିଲା ଜିଲ୍ଲା ବିଜେପି ।
ଏହି ଟିମ ମୟୂରଭଞ୍ଜ ଏସପି ସ୍ମିଥ ପି ପରମାରଙ୍କ ସହ ଆଲୋଚନା କରିବା ସହ ପୀଡିତାଙ୍କ ପରିବାରକୁ ଭେଟିଥିଲା । ଏହା ସହ ରାଇରଙ୍ଗପୁର ଓ ଝାରପୋଖରିଆ ଥାନାରେ ହୋଇଥିବା ମାମଲାର ସମୀକ୍ଷା କରିଛି ଟିମ । ଏହାପରେ ରାଇରଙ୍ଗପୁର ଏସଡିପିଓ ଓ ଆଇଆଇସିଙ୍କ ସହ ଆଲୋଚନା କରିଥିଲେ । ସେଠାରୁ ମହିଳା କମିଶନଙ୍କ ଟିମ ଘଟଣାସ୍ଥଳକୁ ଯାଇ ଘଟଣାର ତନ୍ନ ତନ୍ନ କରି ଅନୁସନ୍ଧାନ କରିଥିଲେ । ଛାତ୍ରୀ ନିବାସରେ ପ୍ରିନ୍ସପାଲ, ମେଟ୍ରୋନ ଓ ହଷ୍ଟେଲରେ ରହୁଥିବା ଛାତ୍ରୀଙ୍କ କଥାବାର୍ତ୍ତା କରିଥିଲେ ।
ଏଥିସହ ମୃତ ଅଧ୍ୟାପିକାଙ୍କ ପରିବାରକୁ କ୍ଷତି ପୂରଣ ବାବଦ ଅନୁକମ୍ପା ରାଶି ପ୍ରଦାନ କରିବା ପାଇଁ ଜିଲ୍ଲା ଆଇନ ପ୍ରାଧିକରଣକୁ ଲିଖିତ ଭାବେ ଜଣାଇଛନ୍ତି ମହିଳା କମିଶନ ଅଧ୍ୟକ୍ଷା । ଏ ଘଟଣାର ପ୍ରତିଟି ଦିଗକୁ ଦୃଷ୍ଟି ଦେବାକୁ ପୋଲିସକୁ ପରାମର୍ଶ ଦେଇଥିଲେ ।
ମୟୂରଭଞ୍ଜରୁ ମୃତ୍ୟୁଞ୍ଜୟ ସେନାପତି ଏବଂ ସଞ୍ଜୟ କୁମାର ପରିଡା, ଇଟିଭି ଭାରତ
