ରାଇରଙ୍ଗପୁର: ମୟୂରଭଞ୍ଜ ଜିଲ୍ଲା ପଞ୍ଚପୀଢ଼ ଉପଖଣ୍ଡରେ ଦିନକୁ ଦିନ ବଢ଼ିବାରେ ଲାଗିଛି ବେଆଇନ ବାଲି ଚାଲାଣ । ଏ ସମ୍ପର୍କରେ ଖବର ପାଇ ଆକ୍ସନ ମୁଡ଼ରେ ଏବେ କରଞ୍ଜିଆ ଏବଂ ଠାକୁରମୁଣ୍ଡା ତହସିଲଦାର। କରଞ୍ଜିଆ ଅଞ୍ଚଳର ନଦୀପଠାରେ ବେଆଇନ ଭାବେ ଦିନରାତି ବାଲି ଉତ୍ତୋଳନ ହେଉଥିବା ଖବର ପାଇବା ପରେ ବୁଧବାର ବିଭିନ୍ନ ସ୍ଥାନରେ ଚଢ଼ାଉ କରି 5ଟି ଟ୍ରାକ୍ଟର ଏବଂ 3ଟି ହାଇୱା ଜବତ କରିଛନ୍ତି କରଞ୍ଜିଆ ତହସିଲଦାର ।
ଜବତ 3ଟି ଟ୍ରାକ୍ଟରକୁ 40 ହଜାର ଟଙ୍କା ଲେଖାଏଁ ଫାଇନ କରିଥିବା ବେଳେ ଗୋଟିଏ ଟ୍ରାକ୍ଟରକୁ 25 ହଜାର ଟଙ୍କା, ଗୋଟିଏ ଟିପରକୁ ମାତ୍ର 10 ହଜାର ଟଙ୍କା, ଗୋଟିଏ ହାଇୱାକୁ ୬୦ ହଜାର ଟଙ୍କା ଫାଇନ ଓ ଅନ୍ୟ 2ଟି ହାଇୱାକୁ ୩ ଲକ୍ଷ ଟଙ୍କା ଫାଇନ କାଟିଛନ୍ତି। ତେବେ ଗାଡ଼ି 2ଟିର ଫାଇନ ନ ଦେବା ସହ ଫରଜରୀ ଟ୍ରାଞ୍ଜିଟପାସ ରଖିଥିବା ହେତୁ ଗାଡି ମାଲିକଙ୍କ ବିରୋଧରେ କେସ କରିବା ପାଇଁ କରଞ୍ଜିଆ ଥାନାକୁ ଲିଖିତ ଅଭିଯୋଗ କରିଛନ୍ତି କରଞ୍ଜିଆ ତହସିଲଦାର ।
ଅନ୍ୟପଟେ କରଞ୍ଜିଆ ତହସିଲଦାର କିଛି ଗାଡିକୁ ବ୍ୟାପକ ଅନୁକମ୍ପା ଦେଖାଇ ଫାଇନ କରିଥିବା ବେଳେ ଅନ୍ୟ ଗାଡି ମାନଙ୍କ ବିରୋଧରେ ଏତେ କଠୋର ମନୋଭାଵ ଦେଖାଇବା କାରଣ କ'ଣ ଥାଇପାରେ ବୋଲି ସାଧାରଣରେ ଆଲୋଚନା ହେଉଛି। କିଛି ଗାଡିକୁ ଧରି ବାଃ ବାଃ ନେଉଥିବା ବେଳେ ବାଲି ଘାଟ ମାନଙ୍କରେ କେବେ ଚଢାଉ ହେବ ବୋଲି ପ୍ରଶ୍ନ କରିଛନ୍ତି ସାଧାରଣ ଲୋକେ।
ଅନ୍ୟପଟେ ଠାକୁରମୁଣ୍ଡା ତହସିଲଦାର ପ୍ରଦ୍ୟୁମ୍ନ କୁମାର ନାଏକ ଗୁରୁବାର ସକାଳୁ ଗୋଟିଏ ବାଲି ବୋଝେଇ ହାଇୱା ଓ ଗୋଟିଏ ଚିପ୍ସ ବୋଝେଇ ହାଇୱା ଗାଡି ଠାକୁରମୁଣ୍ଡା ବଜାର ନିକଟରୁ ଜବତ କରିଛନ୍ତି । ଗାଡ଼ି ଗୁଡ଼ିକର ଯାଞ୍ଚ ବେଳେ ବୁଧବାର ଚାଲାଣ ହୋଇଥିବାର ଜଣାପଡିଛି । ଉକ୍ତ ଗାଡି 2ଟିକୁ ଜବତ କରି ତହସିଲ କାର୍ଯ୍ୟାଳୟ ସମ୍ମୁଖରେ ରଖିଥିବାର ସୂଚନା ମିଳିଛି।
ରାଇରଙ୍ଗପୁରରୁ ସଞ୍ଜୟ ପରିଡା, ଇଟିଭି ଭାରତ
