ରାଇରଙ୍ଗପୁର: ମୟୁରଭଞ୍ଜ ଜିଲ୍ଲା କରଞ୍ଜିଆ ସହରରେ ଦିନକୁ ଦିନ ଲୁଟେରାମାନେ ସକ୍ରିୟ ହୋଇ ଉଠିଥିବା ଦେଖିବାକୁ ମିଳିଛି । ସାତଦିନ ପୂର୍ବରୁ ଜନୈକ ଅବସରପ୍ରାପ୍ତ ଶିକ୍ଷକଙ୍କ ଠାରୁ ଏକ ଲକ୍ଷ ଟଙ୍କା ଲୁଟ କରି ନେଇଥିବାବେଳେ ପୁଣି ଏକ ଘଟଣା ଆଜି ଦେଖିବାକୁ ମିଳିଛି ।
କରଞ୍ଜିଆ ଥାନା ମିର୍ଗୀନାଣ୍ଡି ଗ୍ରାମର ଯନ୍ତ୍ରୀ ନାୟକ ନାମକ ମହିଳା କରଞ୍ଜିଆ ଷ୍ଟେଟ ବ୍ୟାଙ୍କରେ ନିଜର ସୁନା କାନ ଫୁଲ, ହାର ଏବଂ ରୂପାର ପାଉଁଜିକୁ ବନ୍ଧା ଦେଇ ଟଙ୍କା ନେବା ପାଇଁ ଷ୍ଟେଟ ବ୍ୟାଙ୍କକୁ ଯାଇଥିଲେ । ହେଲେ, ବ୍ୟାଙ୍କ କର୍ତ୍ତୃପକ୍ଷ ଉଚିତ ମୂଲ୍ୟ ନ ଦେବାରୁ ସେ ବ୍ୟାଙ୍କରୁ ଫେରୁଥିବାବେଳେ କରଞ୍ଜିଆର ରାଧେ ରାଧେ ଦୋକାନ ପାଖରୁ ଏକ ବାଇକରେ ଦୁଇ ଜଣ ଦୁର୍ବୃତ୍ତ ଆସି ମହିଳାଙ୍କ ବ୍ୟାଗକୁ ଝାମ୍ପି ନେଲେ ।
ମହିଳା ଜଣଙ୍କ ବାଇକରୁ ତଳେ ପଡ଼ିଯାଇଥିଲେ ଏବଂ ଜୋରରେ ପାଟି କରିଥିଲେ । କିନ୍ତୁ ସେତିକିବେଳେ ଲୁଟେରାମାନେ ଘଟଣା ସ୍ଥଳରୁ ଚମ୍ପଟ ମାରିଥିଲେ ।
ପୋଲିସ ଖବର ପାଇ ରାସ୍ତା କଡ଼ର ସିସିଟିଭି କ୍ୟାମେରା ଏବଂ ଷ୍ଟେଟ ବ୍ୟାଙ୍କର ସି ସି କ୍ୟାମେରାକୁ ଯାଞ୍ଚ କରି ତଦନ୍ତ ଚଳାଇଛି l
ରାଇରଙ୍ଗପୁରରୁ ସଞ୍ଜୟ କୁମାର ପରିଡା, ଇଟିଭି ଭାରତ
