ରାଇରଙ୍ଗପୁର: ସାରା ଦେଶର ଆଜି 74ତମ ସ୍ବାଧୀନତା ଦିବସ ପାଳନ କରୁଛି । ମୟୂରଭଞ୍ଜ ଜିଲ୍ଲା ବିଶୋଇ ଅଞ୍ଚଳରେ ସ୍ବାଧୀନତା ଦିବସ ଅବସରରେ ଚାରା ରୋପଣ କରି ମାତୃଭୂମିକୁ ସବୁଜ ସୁନ୍ଦର କରିବାର ଏକ ଛୋଟ ପ୍ରୟାସ କରିଛନ୍ତି ।
ମୟୂରଭଞ୍ଜ ଜିଲ୍ଲା ବିଶୋଇ ଅଞ୍ଚଳର ନେହେରୁ ଯୁବ କେନ୍ଦ୍ର ସଂଗଠନ ଶାଖା ତରଫରୁ ସମାଜସେବୀ ଦେବବ୍ରତ ସିଂ ଙ୍କ ପ୍ରୟାସରେ ମୁଖ୍ୟ ଅତିଥି ଭାବେ ବିଶୋଇ ରେଞ୍ଜର ପ୍ରଦୀପ କୁମାର ପୃଷ୍ଟି ଯୋଗଦେଇ ଚାରା ରୋପଣ କାର୍ଯ୍ୟକ୍ରମ ଆରମ୍ଭ କରିଛନ୍ତି । ପ୍ରଥମ ପର୍ଯ୍ୟାୟରେ ବିଶୋଇ ଅଞ୍ଚଳର ପାଞ୍ଚଟି କ୍ଳବ ଯଥା ସାରନା ମାର୍ଶାଲ ୟୁଥ କ୍ଲବ, ବାବା ଜଳେଶ୍ବର ୟୁଥ କ୍ଲବ ଏବଂ ଅନ୍ୟ ତିନୋଟି କ୍ଳବର ସହାୟତାରେ 1500 ଚାରା ରୋପଣ କରାଯାଇଛି । ବିଶୋଇ ରେଞ୍ଜର ମଧ୍ୟ ନିଜେ 15ଟି ଚାରା ରୋପଣ କରିଛନ୍ତି ।
ଅଗଷ୍ଟ ମାସ ଶେଷ ସୁଦ୍ଧା ବିଶୋଇ ଅଞ୍ଚଳର ବିଭିନ୍ନ କ୍ଲବର ସହାୟତାରେ ଆହୁରି ମଧ୍ୟ 5000 ଚାରା ରୋପଣ କରାଯିବ ବୋଲି ସମାଜସେବୀ ଦେବବ୍ରତ କହିଛନ୍ତି । ତେବେ ତାଙ୍କର ଏହି କାର୍ଯ୍ୟକ୍ରମକୁ ସାଧାରଣରେ ପ୍ରଶଂସା କରାଯାଉଥିବା ଦେଖିବାକୁ ମିଳିଛି ।
ରାଇରଙ୍ଗପୁରରୁ ସଞ୍ଜୟ ପରିଡା,ଇଟିଭି ଭାରତ
