ବାରିପଦା: ମୟୂରଭଞ୍ଜ ଜିଲ୍ଲା ବାରିପଦା ବନଖଣ୍ଡ ପିଠାବଟା ରେଞ୍ଜ ଅଫିସରୁ ବଜ୍ରକାପ୍ତା ଗାଏବ । ସୂଚନା ଅନୁସାରେ, ବନବିଭାଗ ଗତ ଅକ୍ଟୋବର 29 ତାରିଖ ଦିନ ଉଦ୍ଧାର କରିଥିଲା ଏକ ଜୀବନ୍ତ ବଜ୍ରକାପ୍ତା । ଏହି ଘଟଣାରେ ଚାରି ଜଣଙ୍କୁ ଗିରଫ ମଧ୍ୟ କରାଯାଇଥିଲା । ଉଦ୍ଧାର ବଜ୍ରକାପ୍ତାକୁ ପିଠାବଟା ରେଞ୍ଜ ଅଫିସରେ ରଖା ଯାଇଥିଲା ।
ଭିଡିଓ ସୌଜନ୍ୟ- ସମ୍ବାଦଦାତା, ମୟୂରଭଞ୍ଜ
ତେବେ ଅକ୍ଟୋବର 31 ତାରିଖ ଦିନ ମାଆ ବଜ୍ରକାପ୍ତାଟି ଏକ ଶାବକକୁ ଜନ୍ମ ଦେଇଥିଲା । ହେଲେ ଆଜି ସକାଳୁ ବନବିଭାଗର ପିଠାବଟା ରେଞ୍ଜ ଅଫିସରୁ ବଜ୍ରକାପ୍ତାଟି ନିଖୋଜ ଥିବା ଜଣାପଡିଛି ।
ବନବିଭାଗର ରେଞ୍ଜ ଅଫିସରୁ ମାଆ ବଜ୍ରକାପ୍ତା ଗାଏବ ରହିଥିବା ବେଳେ ଛୁଆ ବଜ୍ରକାପ୍ତାଟି ଗତକାଲି ରାତିରୁ ମୃତ୍ୟୁବରଣ କରିଥିବା ସୂଚନା ରହିଛି । ଏନେଇ ବନବିଭାଗ ପକ୍ଷରୁ ଅଧିକ ତଦନ୍ତ ଜାରି ରହିବ ବୋଲି କହିଛନ୍ତି ବାରିପଦା ବନଖଣ୍ତ ଅଧିକାରୀ ସୟମ ମଲ୍ଲିକ ।
ମୟୂରଭଞ୍ଜରୁ ମୃତ୍ୟୁଞ୍ଜୟ ସେନାପତି, ଇଟିଭି ଭାରତ
