ବାରିପଦା: ବଦଳିବ ଦ୍ବିତୀୟ ଶ୍ରୀକ୍ଷେତ୍ର ବାରିପଦାର ଶ୍ରୀଶ୍ରୀ ହରିବଳଦେବଜୀଉ ମନ୍ଦିରର ରୂପରେଖ । ଜାନୁଆରୀ ୭ ତାରିଖରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ମୟୁରଭଞ୍ଜ ଜିଲ୍ଲା ଗସ୍ତରେ ଆସି ଶ୍ରୀ ଶ୍ରୀ ହରିବଳଦେବଜୀଉ ମନ୍ଦିରର ଉନ୍ନତି କରଣ ପାଇଁ ୫ କୋଟି ଟଙ୍କା ଆର୍ଥିକ ସହାୟତା ଘୋଷଣା କରିଥିଲେ । ତେବେ ଆଜି ମୟୂରଭଞ୍ଜ ଜିଲ୍ଲାପାଳ ଭିନୀତ ଭରଦ୍ବାଜ ମନ୍ଦିର ବୁଲି ଦେଖିଛନ୍ତି ।
ଜିଲ୍ଲାପାଳଙ୍କ ସମେତ ପୂର୍ତ୍ତ ବିଭାଗ, ମ୍ୟୁନିସିପାଲିଟି କାର୍ଯ୍ୟ ନିର୍ବାହୀ ଅଧିକାରୀ ଓ ଦେବୋତ୍ତର ବିଭାଗର ଅଧିକାରୀ ଆଜି ଅଚାନକ ମନ୍ଦିରରେ ପହଞ୍ଚିଥିଲେ । ସେବାୟତ ଓ ସ୍ଥାନୀୟ ବୁଦ୍ଧିଜୀବୀଙ୍କ ସହ ମନ୍ଦିରର ଉନ୍ନତି କରଣ ଓ ବିଭିନ୍ନ ସମସ୍ୟା ସମ୍ପର୍କରେ ଆଲୋଚନା କରିବା ସହ ପ୍ରଭୁ ଶ୍ରୀ ଜଗନ୍ନାଥଙ୍କୁ ଦର୍ଶନ କରିଛନ୍ତି ।
ପ୍ରାରମ୍ଭିକ ପର୍ଯ୍ୟାୟରେ ନାଗରା ଭାଡ଼ିର ଉନ୍ନତିକରଣ, ବିଶୁଦ୍ଧ ପାନୀୟ ଜଳର ବ୍ୟବସ୍ଥା, ଜଳ ନିଷ୍କାସନର ବ୍ୟବସ୍ଥା, ମନ୍ଦିରରେ ଉନ୍ନତ ମାନର ମାର୍ବଲ ଲଗାଇବା, ମନ୍ଦିର ବେଢ଼ାରେ ଥିବା ଛୋଟ ଛୋଟ ମନ୍ଦିରର ଉନ୍ନତିକରଣ ତଥା ଅନ୍ନପ୍ରସାଦ ପ୍ରସ୍ତୁତ ଗୃହର ଉନ୍ନତିକରଣ ବିଷୟରେ ଆଲୋଚନା କରିବା ସହିତ ଖୁବଶୀଘ୍ର କାର୍ଯ୍ୟ ଆରମ୍ଭ ହେବ ବୋଲି ସୂଚନା ଦେଇଛନ୍ତି ଜିଲ୍ଲାପାଳ ଭିନୀତ ଭରଦ୍ବାଜ ।
ମୟୁରଭଞ୍ଜରୁ ମୃତ୍ୟୁଞ୍ଜୟ ସେନାପତି, ଈଟିଭି ଭାରତ
