ରାଇରଙ୍ଗପୁର: ରାଇରଙ୍ଗପୁର ସହରରେ ପୁଣି ଲୁଟେରା ଗ୍ୟାଙ୍ଗ ସକ୍ରିୟ । ଅବସରପ୍ରାପ୍ତ ଶିକ୍ଷକଙ୍କ ଠାରୁ ଲୁଟି ନେଲେ ନଗଦ ୪୦ ହଜାର ଟଙ୍କା । ଦିନ ୧୧ ଟା ସମୟରେ ରାଇରଙ୍ଗପୁର ସିଭିଲ କୋର୍ଟ ସମ୍ମୁଖରୁ ଲୁଟ କଲେ ଲୁଟେରା ।
ଗୋରୁମହିଷାଣି ଥାନା ଅନ୍ତର୍ଗତ ବଡମୌଦା ଗ୍ରାମର ଅବସରପ୍ରାପ୍ତ ଶିକ୍ଷକ ପ୍ରଫୁଲ୍ଲ କୁମାର ଦାସ ରାଇରଙ୍ଗପୁର ଷ୍ଟେଟ ବ୍ୟାଙ୍କ ଅଫ ଇଣ୍ଡିଆ ଶାଖାରୁ ନଗଦ ୪୦ ହଜାର ଟଙ୍କା ଉଠାଇ ଚାଲିଚାଲି ସିଭିଲ କୋର୍ଟ ବାଟ ଦେଇ ବସଷ୍ଟାଣ୍ଡକୁ ଯାଉଥିଲେ । ସିଭିଲ କୋର୍ଟ ସମ୍ମୁଖରେ ବିପରୀତ ଦିଗରୁ ଏକ ବାଇକ ଯୋଗେ ଦୁଇ ଜଣ ଲୁଟେରା ୪୦ ହଜାର ଟଙ୍କା ଥିବା ଥଳିଟିକୁ ତାଙ୍କ ହାତରୁ ଲୁଟ କରି ଦୃତ ଗତିରେ ପଳାଇ ଯାଇଥିଲେ ।
ଏନେଇ ଅବସରପ୍ରାପ୍ତ ଶିକ୍ଷକ ଜଣକ ରାଇରଙ୍ଗପୁର ଟାଉନ ଥାନାରେ ଲିଖିତ ଅଭିଯୋଗ କରିବା ପରେ ରାଇରଙ୍ଗପୁର ଟାଉନ ଥାନା ପୋଲିସ ଘଟଣାର ଛାନଭିନ ଆରମ୍ଭ କରିଛି । ତେବେ କିଛି ଦିନ ପୂର୍ବରୁ ଗତ ତା୦୪/୧୧/୨୦୨୦ରିଖ ସନ୍ଧ୍ୟା ୭.୦୦ ସମୟରେ ରାଇରଙ୍ଗପୁର ସହରର ସୁନା ଗହଣା ବ୍ୟବସାୟୀ ଭବରଞ୍ଜନ ପରିଡ଼ାଙ୍କ ବାସଭବନ ସମ୍ମୁଖରୁ ଦୁଇ ଜଣ ଲୁଟେରା ଏକ ବାଇକ ଯୋଗେ ଆସି ନଗଦ ୬୦ ହଜାର ଟଙ୍କା ଥିବା ବ୍ୟାଗଟିକୁ ଲୁଟ କରି ଖସି ପଳାଇଯାଇଥିଲେ ।
ତେବେ ରାଇରଙ୍ଗପୁର ସହରରେ ପୋଲିସ ପେଟ୍ରୋଲିଂ କରୁଥିଲେ ମଧ୍ୟ ଲୁଟେରାମାନେ ପୋଲିସକୁ ଚ୍ୟାଲେଞ୍ଜ କରି ଲୁଟ କରିବାରେ ସଫଳ ହେଉଛନ୍ତି । ଏଇ ବାଇକ ଯୋଗେ ଲୁଟ କରୁଥିବା ଲୁଟେରା ଗ୍ୟାଙ୍ଗକୁ ଯଥାଶୀଘ୍ର ଗିରଫ କରିବା ପାଇଁ ସାଧାରଣରେ ଦାବି ହେଉଛି ।
ରାଇରଙ୍ଗପୁରରୁ ସଞ୍ଜୟ ପରିଡା, ଇଟିଭି ଭାରତ
