ବାରିପଦା: ସ୍ତ୍ରୀକୁ ମାରି ମୃତଦେହ କୂଅରେ ପକାଇଲା ସ୍ବାମୀ । ଦୁର୍ଗନ୍ଧ ହେବାରୁ ଗ୍ରାମବାସୀ ଅଗ୍ନିଶମ କର୍ମଚାରୀ ଡାକିବା ପରେ ମୃତଦେହ ଉଦ୍ଧାର କରାଯାଇଛି । ଏପରି ଲେମହର୍ଷଣକାରୀ ଘଟଣା ଆସିଛି ବାରିପଦା ସଦର ଥାନା ଅନ୍ତର୍ଗତ ଚନ୍ଦନପୁର ପଞ୍ଚାୟତ ବୈଦିପୁର ଗାଁରୁ । ମୃତ ମହିଳା ଜଣକ ହେଉଛନ୍ତି ସେହି ଗ୍ରାମର ୩୫ ବର୍ଷୀୟା କର୍ମୀ ମାରାଣ୍ଡି । ମୃତ କର୍ମୀ ମାରାଣ୍ଡି ହେଉଛନ୍ତି ମୁନସୀ ମାରାଣ୍ଡିଙ୍କ ପ୍ରଥମ ସ୍ତ୍ରୀ । ତାଙ୍କର ୩ଟି ଝିଅ ଓ ଗୋଟିଏ ପୁଅ ଅଛନ୍ତି ।
ସୂଚନା ମୁତାବକ ଗତ ୪ ଦିନ ତଳେ ବାଦଣା ପର୍ବରେ ତାଙ୍କ ସ୍ବାମୀ ମୁନସୀ ମାରାଣ୍ଡି, କର୍ମୀଙ୍କୁ ପିଟାପିଟି କରିଥିବାର ତାଙ୍କ ପିଲାମାନେ ଦେଖିଥିଲେ । ତେବେ ଗତ ୨ ଦିନ ତଳେ କର୍ମୀଙ୍କୁ ମାରି କୂଅ ଭିତରେ ପକାଇ ଦେଇଥିବାର ଅନୁମାନ କରାଯାଉଛି । ଉକ୍ତ ଘଟଣାରେ ପୋଲିସ ତାଙ୍କ ସ୍ଵାମୀଙ୍କୁ ଗିରଫ କରିବା ସହ ଅଧିକ ତଦନ୍ତ ଆରମ୍ଭ କରିଛି । ହତ୍ୟାକାଣ୍ଡର ପ୍ରକୃତ ଘଟଣା ଜଣାପଡି ନଥିବା ବେଳେ ତଦନ୍ତ ପରେ ସଠିକ ତଥ୍ୟ ପଦାକୁ ଆସିବ ।
ମୟୂରଭଞ୍ଜରୁ ମୃତ୍ୟୁଞ୍ଜୟ ସେନାପତି, ଇଟିଭି ଭାରତ
