ପୁରୀ: 5 ଡକାୟତଙ୍କୁ ଗିରଫ କଲା ପୋଲିସ । ପୁରୀ କାକଟପୁର ପୋଲିସ ଏକ 5 ଜଣିଆ ଡ଼କାୟତ ଗ୍ୟାଙ୍ଗକୁ ଧରିବାରେ ସଫଳ ହୋଇଛି। କାକଟପୁର ଥାନା ସୋମନାଥପୁର ପେଟ୍ରୋଲ ପମ୍ପ ନିକଟରୁ 20 ତାରିଖ ବିଳମ୍ବିତ ରାତିରେ ଏହି ଡ଼କାୟତଙ୍କୁ ଧରିଛି ପୋଲିସ।
ତେବେ ରାତିରେ ଉକ୍ତ ରାସ୍ତା ଦେଇ ଯାଉଥିବା ବ୍ୟକ୍ତିଙ୍କ ଠାରୁ ଲୁଟ ଉଦ୍ଦେଶ୍ୟରେ ଡ଼କାୟତମାନେ ଏକାଠି ହୋଇଥିବା ଜାଣି ପୋଲିସ ପକ୍ଷରୁ ଚଢାଉ କରାଯାଇଥିଲା। ସମସ୍ତ 5 ଜଣ ଡ଼କାୟତଙ୍କୁ ପୋଲିସ ଗିରଫ କରି କୋର୍ଟଚାଲାଣ କରିଛି ।
ଗିରଫ ଅଭିଯୁକ୍ତମାନେ ଉକ୍ତ ଅଞ୍ଚଳରେ ଛେଳି ଚୋରି କରୁଥିବା ମଧ୍ୟ ଜଣାପଡିଛି। କଟକ ନିଆଳିର କଲିମ ଶାହା ଓ ତାର 4 ସାଥିକୁ ପୋଲିସ ଗିରଫ କରି କୋର୍ଟଚାଲାଣ କରିଛି। ଅଭିଯୁକ୍ତଙ୍କ ଠାରୁ ଖଣ୍ଡା, ଲୁହା ରଡ଼, ଛୁରୀ ସମେତ ଏକ କାର ଜବତ କରିଛି ପୋଲିସ ।
ପୁରୀରୁ ଶକ୍ତି ପ୍ରସାଦ ମିଶ୍ର, ଇଟିଭି ଭାରତ
