ରାଇରଙ୍ଗପୁର: ମୟୂରଭଞ୍ଜ ଜିଲ୍ଲା କରଞ୍ଜିଆ ବନଖଣ୍ଡରେ ପୁଣି ରବିବାର ଝାଡଖଣ୍ଡି ହାତୀପଲଙ୍କ ଉପଦ୍ରବ ଦେଖିବାକୁ ମିଳିଛି । କରଞ୍ଜିଆ ଅନ୍ତର୍ଗତ କିଛି ଗ୍ରାମରେ ହାତୀପଲ ପଶି 3ଟି ଘର ଭାଙ୍ଗିଛନ୍ତି ।
ମିଳିଥିବା ସୂଚନା ଅନୁସାରେ, ଆଠ ଦିନ ବ୍ୟବଧାନ ପରେ ମୟୂରଭଞ୍ଜ ଜିଲ୍ଲା କରଞ୍ଜିଆ ବନଖଣ୍ଡକୁ ପୁଣି ଝାଡ଼ଖଣ୍ଡି ହାତୀପଲ ଫେରିଥିବା ବେଳେ ଏହି ହାତୀପଲରେ ୨୪ଟି ହାତୀ ଥିବା ଜଣାପଡ଼ିଛି । ଏହି ହାତୀପଲ କରଞ୍ଜିଆ ରେଞ୍ଜ ଅନ୍ତର୍ଗତ ଶୁକୃଳି ବ୍ଲକର ଅର୍ଜୁନବିଲ୍ଲା ଗ୍ରାମରେ ଗୋଟିଏ ଓ ଘାଗି ଗ୍ରାମରେ ଦୁଇଟି ଘର ଭାଙ୍ଗିଥିବା ବେଳେ ଆସବାବପତ୍ର ମଧ୍ୟ ନଷ୍ଟ କରିଛନ୍ତି ।
ସେପଟେ ତିନି ଭାଗ ହୋଇ ହାତୀପଲ ପୃଥକ ପୃଥକ ସ୍ଥାନରେ ରହିଛନ୍ତି । ହାତୀପଲ କରଞ୍ଜିଆ ବନଖଣ୍ଡ ଅଞ୍ଚଳରେ ପାଚିଲା ଧାନ ଫସଲ ଖାଇଯିବା ସହିତ ଦଳି ଚକଟି ନଷ୍ଟ କରିବା ସହ ବ୍ୟାପକ କ୍ଷୟକ୍ଷତି କରିଛନ୍ତି । ଅନ୍ୟପଟେ ଗ୍ରାମବାସୀମାନେ ଆତଙ୍କିତ ଅବସ୍ଥାରେ ରହୁଥିବା ବେଳେ ହାତୀପଲଙ୍କୁ ଘଉଡ଼ାଇବା ପାଇଁ ବନବିଭାଗ ପକ୍ଷରୁ ପ୍ରୟାସ ଜାରି ରହିଛି ।
ରାଇରଙ୍ଗପୁରରୁ ସଞ୍ଜୟ କୁମାର ପରିଡା, ଇଟିଭି ଭାରତ
