ରାଇରଙ୍ଗପୁର: ମୟୂରଭଞ୍ଜ ଜିଲ୍ଲାରେ ଦିନକୁ ଦିନ ବଢ଼ିବାରେ ଲାଗିଛି ହାତୀ ମଣିଷ ଲଢେଇ । ଗତ 3 ବର୍ଷ ମଧ୍ୟରେ ହାତୀ ଆକ୍ରମଣରେ 8 ଜଣଙ୍କର ମୃତ୍ୟୁ ଘଟିଥିବା ବେଳେ 10ରୁ ଅଧିକ ଗୁରୁତର ଆହତ ହୋଇଛନ୍ତି । ସେହିପରି 100ରୁ ଅଧିକ ଘର ଭାଙ୍ଗିଥିବା ବେଳେ ଶହଶହ ଏକର ଧାନ ଫସଲ ମଧ୍ୟ ନଷ୍ଟ କରିଛନ୍ତି ହାତୀପଲ । ହେଲେ ସେତିକରେ ମଧ୍ୟ ଲୋକେ ସଚେତନ ହେଉ ନଥିବାରୁ ବର୍ତ୍ତମାନ ହାତୀ ମଣିଷ ଲଢେଇ ଆହୁରି ଜୋରଦାରେ ହେବାରେ ଲାଗିଛି । ଏହି ଭୟଙ୍କର ଦୃଶ୍ୟ ଏବେ ଭାଇରାଲ ହେବାରେ ଲାଗିଛି ।
ଗତ କିଛି ଦିନ ତଳେ କରଞ୍ଜିଆ ବନଖଣ୍ଡ ଦୁଧିଆଣି ରେଞ୍ଜ ତୋଟା ସାହିରେ କିଛି ଯୁବକ ଗୋଟିଏ ଦନ୍ତାହାତୀକୁ ଚାବୁକରେ ବାରମ୍ବାର ପିଟୁଥିବା ଦୃଶ୍ୟ ଯେତିକି ଭୟଙ୍କର ଥିଲା ତାଠାରୁ ବେଶୀ ଭୟଙ୍କର ଦୃଶ୍ୟ ଦେଖିବାକୁ ମିଳିଛି ଉଦଳା ରେଞ୍ଜ ଦାମସାହିରେ । ଜଣେ ଜନୈକ ଯୁବକ ହାତୀ ନିକଟରେ ସେଲ୍ଫି ନେବା ବେଳେ ହାତୀ ଆକ୍ରମଣର କିପରି ଶିକାର ହେଉଛନ୍ତି ତାର ଭୟଙ୍କର ଚିତ୍ର ଏବେ ଭାଇରାଲ ହୋଇଛି । ବାରମ୍ବାର ଯୁବକକୁ ଶୁଣ୍ଢ ଦ୍ବାରା ଆକ୍ରମଣ କରୁଥିବା ବେଳେ ଯୁବକ ଜଣକ ଜୀବନ ବଞ୍ଚାଇବା ପାଇଁ ମଧ୍ୟ ଦୌଡିବା ସମୟରେ ଝୁଣ୍ଟି ପଡିବାର ଭୟଙ୍କର ଦୃଶ୍ୟ ସାମ୍ନାକୁ ଆସିଛି ।
ସେହିପରି କରଞ୍ଜିଆ ରେଞ୍ଜ ଅନ୍ତର୍ଗତ ଘରମାବେଡା ଜଙ୍ଗଲ ନିକଟରେ ମଧ୍ୟ ଆଉ ଗୋଟିଏ ସେହିପରି ଦୃଶ୍ୟ ସାମ୍ନାକୁ ଆସିଛି । ଉକ୍ତ ଜଙ୍ଗଲରୁ ଏକ ଦନ୍ତା ଦିନ ୨ଟାରୁ ବାହାରି ଆସିବାରୁ ଲୋକେ ତା' ପଛରେ ଦୌଡି ଘଉଡାଇବା ସହିତ ଜଣେ ବ୍ୟକ୍ତି ହାତୀଟିକୁ ଏକ ବାଡ଼ି ସାହାଯ୍ୟରେ ପିଟୁଥିବା ଥିବାବେକୁ ମିଳିଛି । ଏହି ସମୟରେ ହାତୀଟି ମଧ୍ୟ ପ୍ରତି ଆକ୍ରମଣ କରିଛି । ଯାହାର ଦୃଶ୍ୟ ବେଶ ଭୟଙ୍କର । ବ୍ୟକ୍ତି ଜଣକ ଏକ କଲଭର୍ଟ ତଳେ ଲୁଚି ଯିବା ଫଳରେ ନିଶ୍ଚିତ ମୃତ୍ୟୁ ମୁଖରୁ ରକ୍ଷା ପାଇଛନ୍ତି ।
ତେବେ ଏତେ ସବୁ ଘଟଣା ଏବେ ସାମ୍ନାକୁ ଆସୁଥିବା ବେଳେ ବନ ବିଭାଗ ପକ୍ଷରୁ ନା ସଚେତନତା ସୃଷ୍ଟି କରାଯାଉଛି ନା ଏପରି ଦୁଃସାହସିକ କାର୍ଯ୍ୟ କରୁଥିବା ବ୍ୟକ୍ତିଙ୍କ ବିରୁଦ୍ଧରେ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରୁଛି । ଓଲଟା ନିଜର ଦୋଷ ଦୁର୍ବଳତାକୁ ଲୁଚାଇବାକୁ ଚେଷ୍ଟା କରୁଛି ବନ ବିଭାଗ । ତେବେ ଏଇ ହାତୀ ମଣିଷ ଲଢେଇ ଆଗକୁ ଦୂର ହେଉଛି ନା ଏଇ ଲଢେଇରେ ମଣିଷ ତାର ବହୁ ମୁଲ୍ୟ ଜୀବନ ହାରୁଛି ତାହା ଦେଖିବା ପାଇଁ ବାକି ରହିଲା ।
ରାଇରଙ୍ଗପୁରରୁ ସଞ୍ଜୟ ପରିଡା, ଇଟିଭି ଭାରତ
